Hoe dat hertoge Willem weder overghaf sine moeder der keiserinne de graefscappe van Hollant, Zeelant ende Vrieslant.
Dat VIII capitel.
Als Lodewijc van Beyeren, keiser van Romen, oflivich gheworden was, Margriete, die keyserinne, syn huysvrouwe, is uut Beyeren nedergecomen in Henegouwen. Ende alsoe hertoge Willem haer soen, palatijn ende graef van Oestervant, voecht van Hollant, Zeelant ende Vrieslant, sijnre moeder noch nyet ghegeven en hadde noch betaelt van den regemente des lants van Hollant, als voer geseit is, soe is si mit een eerlike familie ende staet ghecomen in Hollant, ende quam in die stede van Dordrecht, ende sende boden tot hertoge Willem haren soen, dat hi bi haer quame. Hertoghe Willem heeft hem bereit met veel heren, ridderen ende edelen, ende is gecomen tot Dordrecht bi zijnre moeder der keyserinne, ende hy gaf ende resigneerde daer over sijnre moeder vrij ende al, voer allen heren ende vasallen, die administracie ende heerlichede der landen van Hollant, Zeelant ende Vrieslant. Dit gedaen sijnde reysde hertoge Willem, grave van Oestervant, in Henegouwen, ende die keiserinne bestont alsdoe de landen van Hollant, Zeelant ende Vrieslant seer slappelick ende cranckelyc in haer selfs persoen te regieren.
Auteursrechtelijk beschermd