Van den oerloghe tusschen den byscop ende den heere van Bronchorst ende dye Ghelres, ende van den rekeninghe der oncosten des oerloechs.
Dat VII capitel.
Die biscop Johan van Uutrecht staende dit bestant, is getogen Overijsel mit heercracht, om te wederstaen de rebelheit heren Gijsbrechts van Bronchorst ende te wreken dye scade ende smadenis die hi hem hadde gedaen. Dye biscop heeft alle sine heerlicheit verwoest, verbrant, ende nam enen groten roef uut dat dorp van Berkeloe, ende verbrande vele husen aldaer. Dit gedaen sijnde hebben hertoge Reinout van Ghelre ende Eduwaert zijn broeder biscop Johan mede ontseyt, doer versoeke hertoge Willems van Beyeren, voecht van Hollant, ende heer Gijsbrechts van Bronchorst. Die biscop van Uutrecht, niettegenstaende dat hi verladen ende beswaert was mit grote sware sculden, heeft hi in sijnre hulpe gecregen heer Sweer van Voerst ende den here van der Cuynre, ende heeft hem daertoe ghestelt om sine vianden vromelicken weder te staen. Ende heeft Vrederic van de Eze, een stout ridder, bevolen dat lant van Zallant, TwenteGa naar voetnoot414 ende dye heerlycheit van Diepenhem, om hem te verweren tegen den assaulte ende anvechten der Gelressen ende heren Gijsbrechts van Bronchorst. Mer des jaers daeraen, doer middele ende vriendelike composicie, sijn dese heeren verenicht gewest ende hebben hem een wijl tijts van oerlogen onthouden. Dese vrede gemaect wesende, heft here Sweer van Voerst den biscop ter rekeninge gebrocht, ende hi in dit oerloge tegen dat slot te Keppel uutgeleit hadde dye zomme van vijfdusent Oude Scilden. Ende here Vrederic van der Eze brocht den biscop te rekeninge ende hi int oerloge tegen die Gelresse uutgeleit ende hem gecost hadde die zomme van XLII dusent ende II C Oude Scilden. Die biscop was seer begaen van deser rekeningen, ende liet heer Vrederic van der Eze op die tijt bliven in sijn sloten ende diensten des lants van Overijsel. In datselve jaer so ontseyden den biscop van Uutrecht here Jan van Gemen, here Jan van Nahusen, die here van Steenvoerden, Ghijsbrecht Zobbe, ridderen. Dese vergaderden een groot deel volcs van wapenen van uutgelesen ridderen ende knechten, ende verwoesteden sere dat Sticht van Uutrecht. Ten lesten is dit oerloge gesoent geweest, nadattet volna een jaer lang hadde gestaen. Ende doe rekende here Vrederic den biscop weder verleyt te hebben in dit oerloge die zomme van XIII M Oude Scilden. Ende also die biscop hem niet voldoen en mochte van den twe voerseyde sommen van penningen, daerom allegeerde ende seyde die voerseide here Vrederic van der Eze dat hy dat gehele lant van Overijsel houden woude voer die eerste ende laetste zomme van penningen.
Auteursrechtelijk beschermd