Van den oerloghen ende stryden tusschen dat Sticht ende Hollant.
Dat VI capitel.
Int jaer Ons Heren M III C XLVIII, omtrent Sint Jans dach te midsomer, soe docht biscop Johan van Arkel dat dat bestant Sinte Margrieten dach daeraen volgende tusscen dat Sticht van Uutrecht ende den Hollanders uutgaen soude, ende is weder te lande ghecomen, ende heeft bevonden dat sijn sculden meer waren vermeert, dan vermindert, bi quaden regimente sijnre ses voechden voorseyt. Alsdan dat bestant op Sinte Margrietendach uutgegaen was opten VIII dach daernae, is die biscop van Uutrecht mit een groot deel sijnre burgeren van der stat van Uutrecht ende van sine ondersaten mit ontwonden bannieren getogen op een groot, groen velt geheten Lapers, leggende bi dat dorp van Emenesse. Daertegen sijn gecomen die Hollanders, ende gingen hem vromeliken tegen met alle haer macht. Ende daer quamt tot enen strijde, mer die Hollanders verloren den strijt, ende here Melis van Minden, ridder, wert daer gevangen mit vele vrome wapentuers. Ende die biscop scattede den gevangen een grote somme van pennigen of. Ende mede bleven daer versleghen vele van den dorpluden van Emenesse. Ende van nootswegen mosten si doen laten varen haer nyewe naem als Oest-Hollant, ende worden gedwongen weder an te nemen haren ouden name Emenesse. Ende si stelden hem doe weder in onderdanicheit van haren biscop, ende bleven hem voertan getrou. In datselve jaer, tusschen Onser Liever Vrouwen dach ten Hemelvaert ende haerre geboerte, heeft hertoge Willem van Beyeren, voecht van Hollant, Zeelant ende Vrieslant, vergadert een groot machtich heer van volc van wapenen, ende is mit heercracht gecomen int lant van Yselstein opten Nyen Dam, ende bleef daer leggen omtrent VIII dagen lang, ende verbarnde dat dorp van Jutphaes, omdat hy dye van Uutrecht verwecken soude uut te comen ende tegen hem te vechten. Mer dye biscop en was in geenre meninge dat te doen, ende is getogen mit IIII M gewapender mannen int lant van Woerden ende Aemsterlant, ende verbrande die naeste dorpen, ende nam een grooten roef wederom mit hem. Here Gijsbrecht van Aemstel, ridder, heeft op dieselve tijt desen biscop Jan van Uutrecht ontseyt, ende verbrande een groot deel des casteels van Ghoer. Dit gesciet wesende, sijn gecomen hertoech Jan van Brabant, grave Jan van Cleve, ende Jan van Beadmont, grave van Boloys, ende hebben wiselic desen
Auteursrechtelijk beschermd