Van den VI voechden des Stichts van Uutrecht.
Dat V capitel.
Als here Robbrecht van Arkel doot was geslegen in den strijt tot Ludic, die dat Sticht van Uutrecht als voecht lange hadde berecht, so bleef here Jan van Arkel, sijn broeder, noch beladen mit grote sware sculden. So heeft hi raet gehouden ende eligeert ende vercoren ses edele mannen dyen hy bovenal betroude ende sere beminde, opdat si ses dat bisdom souden regeren, ende soude te met sine sculden betalen; ende settede hem luden, overste cappiteinen ende voechden alle der steden sloten ende heerlickheden des Stichts van Uutrecht. Ende dese ses waren heer Sweer Uuterloe, canonic in den Dom; here Jan, here van Culenburch; here Henrick, here van Vianen; Jan van Woudenburch; Gijsbrecht van Sterckenburch ende Jacob van Lichtenburch, ridderen. Ende biscop Jan is getogen in Vrancrijc in die stat van Tours, mit cleine geselscap, daer men hem nyet en kende, om aldaer soberlic te leven ter tijt dat dat bestant tusschen dat Sticht ende Hollant uutgaen soude. Daerentusschen dat die biscop uut was, toech here Sweer Uuterloe voorscreven myt gewapender hant op des Heyligen Sacramentsdach, ende vercreech die kercke in Eembrugge, ende dede daerof maken een slot ende een waerlic huys om uut te oerlogen.
Auteursrechtelijk beschermd