Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den geselbroeders.
Dat X capitel.

Int jaer M III C XLIX heeft God van hemelrijc alle de werlt gecastijt mit een grote, sware pestilencie, dat de helft van allen menschen nauwelic te live gebleven en is, also datter vele steden, dorpen ende sloten leech ende onbewoent bleven staen. Doer dese grote sware plaghe ende sterfte zijn in vele plaetsen opgestaen, sonder enige auctoriteit oft outheit⁴¹⁵ van den paeus of der Heiliger Kerken, enige menschen annemende een openbaer penitencie dye ghenoemt waren de Geselbroeders. Dese deden voer hem dragen dat Heilige Cruys ende gingen alsoe mit crucen ende myt vanen twe mael dages in die kerke, ende maecten hem daer al naect, bedeckende haer scamelheden mit enen lindendoec, ende sloeghen hemselven, ende bisonder op die scouderen mit scarpen geesselen, daer knopen ende cleyne ijseren nagelkens in gehecht waren so seer ende wredelic, dat dat bloet tot elken slage daeruut gelopen quam, ende al slaende songen si mit deerliken stemmen, screyende ende suchtende: 'Slaet u seer doer Cristus eer; doer God soe laet die sonden meer.' Ende nijmmermeer en sliepen si den enen nacht, daer si den

415 ontheit AB.

[p. 212v]

andere hadden geslagen. Ende nye en konde men vernemen van wien dese secte ende vergaderinge eerst begonnen was, ende van waen si quamen. Ende met dusdaniger penitencie gingen si van dene stede totter andere, ende van dene plaetse ende dorpe totter ander, omtrent XL dagen lanc. Ende vele luden dit siende worden beroert mit medeliden, ende gingen mede, ende deden als dandere; ende voldoende haer penitencie van XL dagen, gingen si weder thuys. Ende zommige begonnen weder van nyewes, ende volbrochten haer penitencie. Ende uut deser secten quamen oec vele goede dinghen, als quijtsceldynghe van dootslagen, van hat ende nijt ende viantscap, van wederkeringhe onrechtvaerdich goets, etcetera. Ende in desen geselscappe quamen vele diverse personen: biscoppen, prelaten, priesteren ende andere geestelike ende waerlike vrouwen ende mannen personen; men woude seggen, dat si eerst quamen uut Hoech-Duitslant, ende doe in Neder-Duitslant, ende soe voert in Vrancrijc. Dye paeus Clemens die VI versiende dat uut dese vergaderinge ende secte een quader comen mochte, heeft dese openbaer penitencye ende secte op dye pene van den ban ende der ewyger maledictie verboden die niet meer te doen. Ende mit desen is de vergaderinge der menscen ofgestelt geweest.