Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier begint die XXIIII divisie ende heeft XVII capitelen.

Van vrou Margareet, keiserinne van Roem; van Henegouven, van Hollant, Zelant, graefinne; ende vrou van Vrieslant, de XXI; keiser Lodewijcs wijf.
Dat eerste capitel.

Lodewijc, hertoge van Beyeren, keyser van Romen, verhorende dat sijn swagher grave Willem van Hollant ende Vrieslant van den Vriesen verslagen was, heeft hi hem gestelt in keiserliker ornamenten, ende is te recht geseten, ende heeft vonnesse ende ordel van sine princen ende heren versocht.

[p. 209v]

Diewelke allegader seiden ende determineerden, als dat die heerlichede ende graefscappe van Hollant, Zeelant ende Vrieslant gheheel ende al vaceerde, bestorven ende gecomen waer an den Roemschen Rike, want grave Willem van Henegouwen, van Hollant, Zeelant ende Vrieslant gestorven waer sonder enige kinderen after te laten. Diewelcke heerlicheden dye keyser Lodewijc, overmits sine keiserlicke majesteyt ende miltheit op die tijt gaf vrouwe Margriete, sine geechte huysvrouwe, des voerseyde grave Willems suster. Dit gedaen sijnde, als int jaer M III C XLVI, heeft die keyserinne haer bereyt mit een scoen geselscap van heren, ridderen, vrouwen ende joffrouwen, ende is nedergecomen in desen landen van Hollant ende is aldaer ontfangen ende gehult geweest die XXI vrouwe ende graefinne van Hollant, Zeelant ende vrouwe van Vrieslant, ende heeft den landen ende steden haren eet gedaen, wederom van haren vasellen, leenmannen, steden ende dorpen enen behoerliken eet genomen, ende heeft die hantvesten ende privilegien van den landen ende steden seer verbreet ende vermeerdert dan si te voren hadden, ende heeft noch daerenboven een bestant gemaect mitten biscop ende Stichte van Uutrecht, ingaende Sinte Margrietendage int jaer van XLVI; ende soude duren twe jaer lang, dat men soude scriven XLVIII. Dese vrouwe Margryete, keyserinne van Romen, graefinne van Henegouwen, van Hollant, Zelant ende Vrieslant heeft doen confisceren ende toeslaen alle de goeden landen ende renten der Vriesen, gheestelike ende waerlike, die in Hollant ende Zeelant gelegen waren, omdat si in Vrieslant haren broeder ende gherechten here hadden versleghen, dieselve goeden vercopende vele ende diversse personen. Onder andere ghoeden worden oeck vercoft dat lant ende dorp van Marken, dwelcke op dye tijt toebehoerde dat convent ende cloester van Marienghaert, der Oerden van den Premonstreyten, gelegen in Oest-Vrieslant. Datwelcke die abt ende broeders in voerleden tiden gecoft hadden van here Claes Persijn, here van Waterlant.