Hoe dat grote dorp van Emenesse verbrant worde, ende hoe dye Duytsche heren haer woenstat namen binnen Uutrecht.
Dat XVI capitel.
Op dese selve tijt reysde byscop Jan van Uutrecht myt groot volck van wapenen, mit ontwonden bannieren in dat dorp van Emenesse, ende stack daer dat vier in ende verbrandet. Ende sloecher midallen veel doot, dye hem ter weer setteden. Ende nam met hem enen groten roof ende vele ghevanghen. Ende dit daerom: want sij onder den biscop altijt gheseten hadden, ende hoerden ant Stycht, ende hadden in dit oorloghe mede rebelleert, waren den biscop ende dat Stycht ofgegaen, ende hadden hem den grave van Hollant toe laten scriven, latende haer oude naemGa naar voetnoot406, dat ment niet meer hieten en soude Emenesse, mer Oest-Hollant; ende bleven nochtans noch Hollanders twe jaren tijts lang, ter tijt toe dat se die biscop gehelic ende al onder zijn subjectie ende onderdanicheit brochte. Dese here Jan van Arkel, biscop van Uutrecht hadde een grote scone plaets omtrent Sint Marien tUtrecht binnen der stat, daer zijn paertstalle op te staen plach; welke plaetse bi consent der ecclesie ende capitels van den Dom om de liefde Goods ende tot vermeerderinge des Godliken dienst gaf hi den commenduyr ende broeders oft heren der Duitscer Oerden dat si aldaer een convent ende kerke weder tijmmeren souden, want haer convent, husen ende hoven te voren als grave Willem van Hollant voer Uutrecht lach, verdestrueert ende ofghebroken was; ende de biscop dede den heren daertoe grote onderstant ende behulpelicheit.
Dese grave Willem van Henegouwen, Hollant ende Zeelant lyet after een bastert soen geheten heer Danel van den Poel, ridder, de hi gewonnen hadde by een scoen jonffrouwe geheten Alijt van Merwen, wonende tot Sinte Geertenberch.
Auteursrechtelijk beschermd