Van den wrake die die biscop dede opten genen die hem ende sijn stat van Uutrecht tegens geweest hadden in den oerloge.
Dat XV capitel.
Die biscop Jan van Uutrecht, na den mael dat dat bestant op Sinte Martijnsdach uutghegaen was, dede verbannen uut sinen Stichte alle die heren ende edele mannen die den grave assistencie ende bistant hadden gedaen, als hi die stat van Uutrecht hadde belegen; waerom alle dye voergescreven heren sijn gecomen, ende elc bisonder, ende hebben genaede gebeden van haerre rebellicheit; ende deden den biscop grote beteringe van haerre misdaet, uutgheseyt heer Sweer van Abcoude; heer Aernt van Iselsteyn, ende heer Aernt van Uulven. Waerom die biscop is gecomen mit een grote menichte der burgeren van Uutrecht, ende heeft op Sinte Ceciliendach crachtelicken belegen dat casteel te Uulven, dat welke hi crachteliken heeft gewonnen ende gevangen ghenomen alle die daerop waren, ende den biscop dede dat slot destrueren ende ter neder werpen. Daernae toech dye biscop mit heercracht int lant van IJselstein, ende heeft dat tot veel steden verbrant ende beroeft. Dat ghedaen sijnde toech hi voer Abcoude, dwelck hem opghegheven worde; ende dye biscop heeft voert van alle andere sine adversanten ende rebellen wraec ende beterscap genomen.
Auteursrechtelijk beschermd