Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe grave Willem verslegen worde in Oest-Vrieslant.
Dat XIIII capitel.

Dit aldus ghedaen sijnde, heeft grave Willem weder op een niewe vergadert een versch heer van vrome wapentuers, omme Oest-Vrieslant myt heercracht⁴⁰⁵ weder in te winnen. Mer och leyder! Dat heer des vromen prince is sonder ordinancie ende reghel over dat water ghevaren in dat ombekende lant. Waerof alle dat heer een groot ende ongheluckighe quade avonture aenghecomen is. Johan van Henegouwen, grave Jans zoen van Boloys, is met sijn scepen ende met sine vrome ridderen ende wapentuers ghecomen aen dye zuytside van Sinte Odulphus' cloester, ende sloech aldaer sijn tenten op een scoen breet velt, gheheten dye Suytvenne bij den oever van der zee. Ende terstont liepen een deel der Hollanderen sonder merren ende en verbeiden nyet dat grote heer dat nae quam. Ende ghinghen stoutelicken an, ende bevochten dye Vryesen. Ende dreven se een deel binnen Staveren, ende een deel binnen Sinte Odulphus' cloester, alsoe dat sij mit ghewapender hant die vriheit des cloesters als dye kercke ende dat kerchof aenvochten ende bestormden. Ende hyer is te mercken dat dye Hollanders gheen teghenspoet noch wederstant en hadden voerdat sij uut vermetelheyt bevochten dye heylighe plaetsen des cloesters. Dye meer uut Godlicker moghentheit dan mit menschelicker crachten weder uut dat voerseide cloester afterwaerts ghedreven ende gheslegen worden, diewelken die Vriesen te met vervolchden ende dootsloegen.

405 heercraht AB.

[p. 208v]

Die grave Willem, dye van desen ongevalle niet mit allen en wiste, quam mit zijn scepen ant lant gevaren, an die noortside des voerseiden cloesters, ende trat daer opt lant, als een onvervaert vroem prince, myt alle zijn heren ende volc van wapenen, omtrent V C starc wesende; ende dede van stonden an dat eerste dorp daer si bi quamen an brande steken, ende ging voert in dat lant stouteliken tegen sine vianden in; ende sloech alsdoen ter doot myt zijn eygen hant een cloec vroem cappetein der Vriesen, die hem nochtans vromeliken totter doot toe weerde. Die Vriesen dit siende, omsingelden den cleinen hoep der Hollanderen mit een ontallic heer van gewapende, ende sloegen den grave mit alle sine heren ende ridderen ter doot, dat sijts niet en kenden. Ende namen des onbekenden doden graven lichaem, ende sloegen hem dat hooft of, omdat hi horen cappiteyn dootgeslagen hadde. Dese bloedige strijt gesciede op die VI kalende van october op dieselve plaetse daer dye graven van Hollant hier voermaels te recht plagen te sitten als si Oest-Vrieslant onder haer subjectie ende heerscappie hadden; ende hi regierde die graefscap van Hollant acht jaere lang. Ende ditselfde hadde grave Reinout van Gelre mitten swarten hoefde voerseyt, dat dese grave Willem van den Vryesen versleghen soude worden, als hy hem uuter vonten des kerstendoms ende des heiligen doepsel hief. Daerenboven so bleven daer veel meer die verdrencten, dan die mitten swaerde verslegen worden; want si sonder ordinancie te scepe liepen om te ontgaen die wreetheyt ende slagen der Vriesen. In desen stride bleven mitten grave verslegen omtrent V C vrome wapentuers, daer die principaelste ende opperste of waren die here van Hoern; dye here van Lingi; dye here van Valencont; die here van Many; die here van Antougen; die here van Haemstede uut Zeelant; die here van Merwede uut Vlaenderen; ende dit waren alte samen banreheren. Gherrit mitten Baerde; Willem van Naeldwic; Simon ende Dirc van Teylingen; Gwije van Asperen; Johan Reyner ende Willem van Montfoerde; Dirck van Santhorst; Herman van Swieten; Floris van der Merwen; Oetgier van Spangen; Gherrit Ever; Alfert van Bergerhorst; Claes Oom; Willem van Dongen; Dirc van Valencoert; Gerrit van Floreinvijl; ende dit altesamen uutgelesen ridders, mit noch veel meer joncheren ende edele mannen. Opten X dach nadat dese strijt was ghesciet, soe reysde over in Vryeslant here Martyn, commenduyr van Sinte Jans heren te Haerlem, ende bevant bi sekere littekenen des doden graven Willems lichaem leggende onder dye andere doden, ende dede dat brenghen mit noch VIII dode ridders lichamen in een cloester ghelegen bi Bolswaert, geheten Florencamp, of dat Oude Cloester. Johanna, die graefinne, des doden grave Willems huysvrouwe, is wederghereist in Brabant tot hertoech Jan van Brabant, haren vader, dyewelke daerna gegeven worde tot enen man hertoge Wenzelijn van Lutzenburch, coninc Jans anderde soen van Bemen.