Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van dye commissi ende overgevinghe der landen dat dye keyserinne gaf haren outsten soen hertoge Willem.
Dat II capitel.

Margriet, dye keyserinne van Romen, graefinne van Henegouwen, van Hollant, Zeelant ende Vryeslant, hadde by keyser Lodewijc, haren man, ghecreghen Willem, die men hiet die dulle graef; Aelbrecht, hertogen in Beyeren ende graven van Hollant, ende Lodewijc, coninc van Cracouwen. Ende Willem ende Aelbrecht voerseit worden geheten hertogen in Beyeren; niet, dat si Beyeren besaten, mer want si van den stamme ende bloede der hertoghen van Beieren gecomen ende gheboren waren. Want keyser Lodewijc, haer vader, was die anderde soen hertoge Lodewijc van Beyeren ende palensgrave. Die hertoechdommen van Oestenrijck ende van Beyeren houden dat in, ende vermogen dat alle die van haren stamme ende bloede gheboren worden, hertoghen worden geheten. Willem, de outste ende eerste geboren soen der keyserinne, was grave van Oestervant, ende Aelbrecht sijn broeder was here van Nubingen. Dye keyserinne voer hare nemende dat si weder in Beyeren bi haren man trecken woude, heeft mit goeder deliberacie ende rade Willem, haren outsten sone, palatijn ende grave van Oestervant, overgegeven ende bevolen die graefscappen van Hollant, Zeelant ende heerlicheit van Vrieslant te regieren op dusdaniger voerwaerden, als hierna volcht: als dat hertoge Willem geven ende betalen soude sijnre moeder der keiserinne tot sekeren tiden ende terminen alle jaers die zomme van X M Oude Vrancrijcse Scilden. Ende waert sake dat hy tot denselven dagen ende tiden niet en betaelde, dat hi alsdan ghehouden soude wesen vrij weder over te resigneren ende te gheven sijnre moeder tot haerren willen ende versoeken die voerseyde graefscappen ende landen. Ende van desen overdrachte ende voerwaerden worden ghemaect ende ghegheven sekere beseghelde brieven an beyden sijden, ende worden besworen te onderhouden in presencie van vele, groter machtelicke heren, princen ende vasallen. Mer hertoge Willem en onderhilt dese voerwaerden niet, alst na bliken sal.