Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den doot biscop Johan van Diest van Uutrecht ende van dat collegye tot Amersfoert.
Dat VI capitel.

Johan van Diest, biscop van Uutrecht, is dese werlt overleden int jaer M III C XL, op die calende van junio, ende is mit betamelike uutvaert begraven in Sinte Martijns

[p. 206r]

kercke, den Domme, bi sine voervaders, nadat hi dat bisdom cranckelic ende slappelyc hadde berecht XVIII jaer lang. Hi hadde dat casteel te Vredelant myt sinen omghelegen dorpen ende toebehoren te onderpande geset om een somme van penningen an grave Willem van Hollant, ende dat slot te Vollenhoe mit dat gehele Overijsellant hadde hy verset an den grave van Gelre; ende hi hadde gheordineert ende geset ses voechden in den bisdom, die dat bisdom van Uutrecht qualiken ende met crancken voerspoeden ende oerbaer regierden. Niet veel goeder ende profitelicker dingen en heeft dese biscop Johan binnen sinen dagen gedaen, die waerdich zijn om te bescriven, anders dan hi stichtede ende fondeerde dat collegie tot Amersvoert, ende dat hi mit hulp ende bistant der kercken van Uutrecht cofte an den Stichte dat casteel van Diepenhem.