Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den oerloge tusschen den coninc van Vrancric ende Engelant.
Dat IIII capitel.

Eduwaert, dye derde van dyen name, coninc van Engelant, doer raet ende ingeven des graven Robbrechts van Artoys, die doe ter tijt uut Vrancrick verdreven was, heeft doen bereyden ende toemaken vele scepen van oerloghen, mit veel ghewapents volcs, om te conquesteren ende te vercrigen dat conincrijc van Vrancrijc, dwelke hy hem vermat te wesen als dye naeste oer ende erfgename van der cronen, als hyervoer gescreven staet. So is dan in den jaer Ons Heren M III C XXXIX coninc Edewaert overgecomen te scepe, ende heeft hem ter neder ghestelt omtrent Antwerpen, ende heeft overmits grote sware beloften van penninghen alle die meeste heren ende princen van Duytslant tot hem ghecregen, ende zijn bi hem ghecomen mit groot swaer volc van wapenen. In den eersten Lodewijc van Beyeren, keyser van Romen; want si elcs een suster van grave Willem van Heneghouwen ende van Hollant te wive hadden; Jan, hertoge van Lottringen, van Brabant ende van Limburch; Willem, grave van Henegouwen, van Hollant ende Zelant; Reinout, grave van Gelre ende van Zutphen; Willem, grave van Gulic; Jan Beadmont, grave van Bloijs ende van Swessen; Dirck grave van Cleve; die grave van der Berge; dye grave van der Marc, ende noch veel meer princen ende baroenen, heren ende ridderen uut Duytschen landen. Dye keyser Lodewijck vermaende alle die steden sijns keiserrijcs mit brieven ende boden om in sinen hulpe te comen. Ende sende enen brief aen dye stede van Haerlem, ludende aldus: Lodewijc, bi der gracien Goods keiser van Romen, altijt Vermeerder tRijcs. Den wisen ende voersienigen burgemeesteren, scepenen ende raden der stede van Haerlem, onse ghenade ende alle goet. Wy hebben myt onse brieven doen vermanen den doerluchtigen vorst Willem, grave van Henegouwen ende van Hollant, dat hy tot onser versoeken ende begheren hem daertoe gheven wil ende bereyden mit een bequame menichte van volck van wapenen, om mit ons te trecken ende te recupereren ende weder te crigen onse keyserlicke recht teghen Phillips van Valoijs, dye hemselven scrijft ende noemet³⁸⁹ te wesen coninc van Vrancrijc; waerom wi uwer trouwicheit, die gy ons ende den keiserrijc sculdich sijt, uut goeder affectien ende begheerten requireren ende vermanen,

389 in A en B verkortingstekentje z, wat niet gebruikelijk is.

[p. 204v]

dat ghi u bereyt maect myt een bequaem geselcap van gewapende, dat wi u mit uwen here ende grave moghen scouwen ende sien in onsen diensten, ende willen uwer weder ghedachtich wesen ende voer oegen hebben alle die dagen ons levens. Ghegeven tot Vranckevoert. Etcetera. Ende die coninc Eduwaert is mit alle dese princen, vorsten ende heren, mit groter heercracht in Vrancrijc getogen, ende heeft vele plaetsen ende dorpen beroeft, verwoest ende verbrant. Die graef Willem van Henegouwen ende van Hollant heft tot lachter des conincs van Vrancrijcs, sinen oem, die stede van Doernick XI weken lang belegen. Die stede van Camerijcken bevacht hy mede, ende dye stede van Amiens heeft hit meeste deel of verbrant. Ende vele andere steden sloten ende dorpen, XX milen lanck, heeft hi verdestrueert ende meest al verbrant. Die coninc Phillips van Vrancrijc heeft hierteghen vergaedert een groot machtich ende ontallic heer ende volc van wapenen, in denwelken dat waren IIII coningen, te weten hi selver als coninc van Vrancrijc, die coninc van Naverre, dye coninc van Scotlant ende coninc Jan van Bemen; dye hertoge van Lutsenburch, keyser Henrics soen, die sevende van Romen; die aertschebiscop van Riemen; die biscop van Ludic; die biscop van Mets; die biscop van Beanays; die abt van Corby; die abt van Risel. Item, VI hertogen, als Burgongen, Bertangen, Bourbon, Normandien, Loreynen ende Phillips, hertoghe van Oerlins, coninc Phillips soen voerseyt. Item, noch waren daer bi den coninc XXX graven. Ende onder alle dese grote heren, princen ende vorsten waren XII dusent ridderen ende acht uutghelesen ende vroom ter wapen. Dye coninc heeft zijn heer ende tenten op doen slaen in een vaste plaetse, ombesloten alom mit broeclande ende poelen, omtrent II milen weechs van des conincs heer van Engelant. Ende daer lagen dese twe machtighe coningen tegen malkander, sonder ijet sonderlings te bedriven. Ten lesten heeft die coninc van Bemen, wiens dochter die coninc van Vrancrijc tot enen wive hadde, ende die hertoge van Brabant, met dye graefinne van Henegouwen ende van Hollant een soen ende paeys gemaect. Ende elc is weder metten sinen thuyswaert gereyst, sonder ijet meer te bedriven dat scrivens waert is.