Van den strijt die grave Willem hadde teghen die heydenen int conincrijc van Granaten.
Dat III capitel.
Grave Willem verhoerde dat dye coninc van Spangen vele oorlogen ende strijden hadde tegen die heidenen ende ongelovigen des conincrijcs van Granaten, heeft hi int jaer Ons Heren M III C XXXVIII vele scepen doen bereyden ende toemaken mit uutgelesen ridderen ende vrome mannen van oerlogen, ende is als een onvervaert prince gereyst na dat conincrijc van Spangen, ende heeft hem terstont verselt ende verenicht mitten coninc van Spangen, ende zijn tesamen gereyst int conincrijc van Granaten, ende beleyden alom die stat van Asyrien, ende bevochten die stadeliken mit menigerhande assaulte ende storminge; ende dye edele ende ingeseten heidenen weerden hem een corte tijt seer vromeliken, ende keerden die kersten mit ghescutte ende werpinge van stenen van die muren ende toornen van der stat; mer dat en mochte hem niet veel baten, want die grave bevacht stadeliken die stat, ende hy wan se ten lesten stormenderhant. Ende dat hem niet geven en wilde onder dye kersten wet ende dat kersten gelove annemen, sloech hi al doot, man ende wijf, ende en spaerde niement. Ende hi pilgeerde ende beroefde die stat, ende verbrande se, ende toech doe voert in dat lant, ende verwoeste ende verbrande dat, ende nam mit hem enen groten rove. Ende die coninc van Spangen dancte hem seer, ende begaefde hem mit vele grote costelike ghiften ende gaven. Ende hi nam oerlof an den coninc, ende reysde in dat Heilige Lant te Hierusalem, ende versochte dat Heilighe Graf ons Heren, ende toech weder tot sinen landen mit groter eren ende bliscappen.
Auteursrechtelijk beschermd