Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier beghint die XXIII divisie, ende heeft XVI capitelen.

Pausen.
Anno dusent III C XXXV.
Dat eerste capitel.
Benedictus³⁸⁵ die XII paeus.

Benedictus die XII was dye CC VI paus; hi was van Tolosen, ende sat seven jaer, drye maenden ende XVII dagen; hi was een monic van der Bernerdyten Oerde. Hy was een glorioes doctoer in der Godheit, ende seer straf in beneficien te geven. Hi liet enen groten scat after, niet zijn vrienden ende magen, mer den armen ende der Heyliger Kerken. Hi was also straf, dat hi nauwe zijn vrienden ende magen woude kennen, segghende dat die paeus geen vrienden noch magen en hadde.

385 Bendictus AB.

Anno M III C XLII.

Clemens die VI was dye CC VII paeus. Hy was van Lemovicen, ende sat X jaer, VII maenden, XXVIII dagen. Hi heeft dat gulden jaer, dat Bonifacius tot elke C jaren ingeset hadde, verwandelt ende geset van L jaren tot L jaren; ende dit is dat rechte gulden jaer. Dese paeus was een Benedictyn ende van groter doctrinen ende heylicheyt. Hy en lyet niement van hem ongetroost ghaen. Ende starf tot Avinioenen, ende wert aldaer begraven.