Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Anno dusent III C XLVII.
Keyseren.

Karolus dye IIII ( coninck Jans soen van Bemen, die in den strijde tot Cressi van den Enghelschen verslaghen worde ( dese worde van den koervorsten eendrachtelicken gecoren. Hy was een cloec, listich ende wys man, ende seer geleert in menigherley sprake; hi sat in hogen saken die dat keiserryc

[p. 203v]

oft dat conincrijc angingen selver in persone te recht, ende dede enen igeliken recht ende justicie mit sulker tale van sprake, als diegene deden die rechts voer hem plaechden; hi wert uut bevele des paeus Clemens die VI tot enen Roemschen coninc gecoren om te wederstaen die rebellicheit des keysers Lodewijcs. Hi wert te Romen mitter keiserliker cronen ghecroent van dengenen die Innocencius, paeus, dye VI daertoe gheordineert hadde. Hy was veel meer sorchvoudich om dat conincrijc van Bemen in groter eeren ende glorien te extolleren ende te verheffen dan dat keyserrijc. Item. Hy maecte vele statuten ende wetten. Ende bysonder heeft hi enen alten behulpeliken recht statuijt ende wet ghemaect voer alle geestelicke luden ende haer goeden, die men gemeenliken heet Corolina; mer God betert, si wort sere misbruct. Etcetera. Ende als dese keyser een out man geworden was, verwerf hi an den koervorsten dat si sinen outsten soen geheten Wentzelaus³⁸⁶ tot enen Roemschen Coninck koren als hi XV jaer out was; ende dyt was int jaer M III C LXXI. Ende beloefde enen igeliken van den koervorsten te geven hondert³⁸⁷ dusent gulden. Ende dit ghesciet wesende ende hi niet en wist waermede te betalen, heeft hi den corvorsten tot enen onderpant geset sommighe steden ende sloten des keiserrijcxs; ende daerenboven verleende hi hen grote sware tollen opten Rijnstroom, waerom dat Pius de paeus die II scrijft, dat overmits desen versettinge ende onderpandinge des Rijcxs steden dat keiserrijck sinder die tijt nije weder te boven ende te verhalen comen en mochte, want wie tot enen Roemschen Coninc gecoren wert, die moet sweren dat hy den corvorsten by haer pantscappe ende verleninghe laten sal ende die niet wederropen. Ende hierna starf dese keiser Karolus int jaer M III C LXXIX.

386 Wentzelans AB.

387 honder AB.