Van den strijt die die coninc van Vrancrijc ende grave Willem van Henegouwen ende van Hollant tegen de Vlamingen hadden.
Dat XXII capitel.
In den jaer Ons Heren M III C XXVIII heeft die coninc Phillips van Vrancrijc vergadert een groot machtich volck van wapene, ende quam in die graefscap van Vlaenderen; ende in sijn hulpe quam mede dese ghoede grave Willem van Henegouwen ende van Hollant, ende dede sijn tenten setten bi Casselberghe, opdat hi na sijnre ouder gewoente tusscen den coninc ende den Vlamingen enyge vrede ende paijs maken mochte. Dye Vlaminghen haesteden hem van den berge neder te comen, ende meenden den coninc haestelic ende onversien in sine tente doot te slaen; dwelc grave Willem vernemende dede sijn trompetten slaen, sijn bannieren ontwinden, ende quam dat verwoede volc mit enen onversaechden moede tegen. Ende dese twe bataelghen aneengecomen wesende, hebben si elc seer vromeliken gestreden om die overhant ende den prijs des stryts te houden; mer ten lesten worden die Vlamingen also seer vermoeyt, dat si dat velt begaven, ende verloren den strijt. Dye grave sittende op een snel paert, ende doerbrekende mit groter vromicheit die betaelgen, worde van sine paerde geslegen ter aerden, ende was in groten perikel zijns lijfs; ende worde starkeliken bescermt, ende mit groten arbeit weder op zijn paert geholpen, overmits bistant des graven van Oestervant, sinen soen, heer Dirc van Bredenroede, heer Jan van Arkel, heer Phillips, burchgrave van Leyden, heer van Wassennaer, heer Jan van Egmont, Wouters soen van Egmont, heer Aernt van Cruningen, heer Jan van Polanen ende van der Lecke, heer Jan van Haemstede ende heer Willem van Duvenvoerde, ridderen.
Auteursrechtelijk beschermd