Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe grave Willem van Henegouwen ende Hollant te Roem reisde, om te wesen in des conincs Lodewics croninge.
Dat XXI capittel.

[p. 200r]

Int jaer Ons Heren M III C XXVII, doen reisde hertoge Lodewijc van Beyeren, gecoren coninc van Romen, over dat gebercht om te ontfangen die keiserlike crone van den paeus. Ende begeerde seer herteliken op grave Willem van Henegouwen ende van Hollant sinen sweer, wes dochter die coninc te wive hadde, dat hi hem wilde gheseelscap houden ende zijn croninge te eren mit zijnre tegenwoerdicheit, ende screef hem enen brief inhoudende aldus

Lodowijc, bi der gracien Goods coninc van Romen, altijt Vermeerder des Rijcxs, den doerluchtigen vorst ende prince Willem, grave van Henegouwen ende van Hollant, onse gracie ende alle goet! Want overmits der milden gaven Goods vele steden ende castelen verde ende na ons hulde ende trouwe hebben gesworen, die onse voersate keiser Henric saliger gedachtenisse in voertiden onderdanich waren, also dat onse keiserlicke crone te ontfangen ons niement hinder noch moijenisse doen en mach; waerbi wy vermanen dine sweerscap ende trouwe, dien ghi ons ende den keyserijc sculdich biste; daer wy di een overlit of bekennen, datstu sonder merren mit een scoen geselscap van ridderen ende heren coemste in Lomberdien, om mit ons te ontfangen die hoecheit des keyserliken seghes, die ons niet en staet te vercrigen buten u. Gegeven, etcetera.

Grave Willem desen brief ontfangen hebbende, heeft in sijnre geselscap genomen dye grave van Ghelre, die grave van Cleve, die grave van Gulic ende die grave van den Berge, mit VIII C uutgelesen ridderen, ende haeste hem dat geberchte over te passeren ende den keiser bistant te doen tegen die partije van Gwelphe, die hem des behinderen wouden. Ende dit aldus opgenomen hebbende was hi van sinne ende rade dat hi eerst in den Roomschen hove trecken wilde om den coninc Lodewijc mitten paeus te versoenen eer hy myt hem mit ridderliker geselscap in IJtalien reysde. Die paeus heeft dit haesteliken vernomen, ende dede terstont alle die bruggen over den Roen opbreken, opdat dye grave daer nyet lichteliken over comen en soude, ende geboet hem op die piene der ewiger maledixen dat hi weder na sinen landen reysde ende dat hi mitten coninc in IJtalien niet en quame. Ende die grave is aldus van sinen opgenomen opset gekeert ende heeft een weinich tijts ghebleven bi den coninc tot Parijs, ende heeft hem daer seer starckeliken verbonden ende aliancie gemaect mitten coninc tegen den Vlaminghen, die hem van nijewes weder teghen die coninc opstelden ende versetten.