Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die Rijndyc inbrac, ende van biscops Fredericks doot.
Dat XVI capitel.

In den jaer Ons Heren M III C XXII te midsomer, braken die Rijndiken in, ende dat water verhief hem uutermaten hoech in de baeljuscap van Rijnlant, also dat in den bisdom van Uutrecht ende in den lande van Hollant dat coern opten velden verginc ende verdwijnde, ende die velden ende weijen lagen verdroncken van den groten oploep der wateren; waerom dye goede

[p. 199r]

graef Willem der ecclesien cloesters, steden ende edelen bidden dede ende verbinden mit zegel ende brieven, dat si die dijken voertan alsoe starc ende vast maken souden, dat die ingeseten van den landen ende baeljuscap van Rynlant voert van den inbreken der dijken bescermt ende behoet souden wesen. In ditselfde jaer opten XIII calende van augusto, worde biscop Frederic bevaen ende seer ghequelt van den artike, ende starf opt huys ter Horst, als hi dat bisdom vijf jaer lang hadde berecht. Ende zijn lichaem wort gebrocht tot Uutrecht, ende aldaer mit betameliker uutvaert in der Domkerc begraven.