Van Sinte Martijns toern tUtrecht ende tslot tot Gheertenberge, wanneer die gemaect worden.
Dat XV capitel.
In den jaer Ons Heren M III C XX, op der Heiliger Martelarendach Sint Jan ende Sint Pouwels te midsomer, wart dye eerste steen geleit van Sinte Martijns toorne tot Uutrecht. Ende daerna, in den jaer van LXXXII, wort hi volmaect, ende dat cruys mitten wederhaen daerop geset onder biscops Floris tiden, die vijftichste biscop van Uutrecht. Item. Des tsjaers daeran worde oec die eerste steen gheleyt van dat slot tot Sinte Geertrudenberge, dergeenre te spijt diet niet liden en mochten. In datselfde jaer starf oec sonder kinder here Henric die XII, here van Bredenroede. Ende die heerlicheit quam op Dirck, sinen broeder, dye te wive hadde Beatris, des heren Walraven dochter van Valkenburch, die gecomen was van een jonger broeder van Limburch. Hy wan an dese vrouwe, Reinout, grave van Ghenp ende heren van Bredenrode, sinen navolger, Dirck ende Willem, ridderen, ende joncheer Walraven, ende Katrijn, vrouwe van Polanen.
Auteursrechtelijk beschermd