Van Jacob van Oesthoern, die XLIIII biscop van Uutrecht.
Dat XVII capittel.
Bisscop Frederick, begraven wesende, is die goede grave Willem wedergecomen tot Uutrecht, ende heft den capittel der ecclesien gebeden voer biscop Jacob van Zuden, commenduir van Sinte Catrinen der heren van Sint Jans Oerden, dat si hem tot enen biscop kiesen ende nemen wilden. Mer dat capitel is in twe gedeelt geweest, want dat meeste deel der capitelaers coren Jacob van Oesthoerne, domproest van Uutrecht, ende dat minre deel coren desen here Jacob, biscop van Zuden; van welke twedracht een grote rumoer binnen der stat opgestaen is, ende die ghoede grave worde overmits des haesteliken samenlopen des ongestuerde gemeen volcxs een luttel benauwet, van welke oploop die grave seer ontsteken worde tot toernicheit, ende dede des voorseiden domproest ende nyewe elect sijn uuthof ende woninge tot Doern an brande steken, ende vernyelde ende verwoeste al dat daerin was. Die biscop van Zuden anmerckende dat hem alle dye prelaten tegen waren, ende dat hi mit genen rechten den nyewen elect verwinnen mochte, ofghaende ende wikende sine electie, is hi des beroeft geweest, ende Jacob van Oesthoern creech dye confirmacie van biscop Henric van Vernenburch, aertsbiscop van Colen; ende hy worde gewijt die XLIIII biscop van Uutrecht. Dit aldus gesciet wesende, biscop Jacop van Zuden seer begeerlyc staende na dat bisdom van Uutrecht, ende siende dat die gheconfirmeerde Jacob van Oesthoern mit eenre ongeneseliker siecten bevaen was, heeft doen bestellen (als sommige willen seggen) dat die eerste vacancie des stoels ende bisdoms van Uutrecht tot des paeus camere gehouden soude worden, hopende noch doer promotye ende hulpe van sommige waerlike heren dat bisdom te vercrigen. Dese biscop Jacob van Uutrecht was een man van eerliken leven ende een beminre der geesteliker religien, is in datselve jaer oflivich geworden op dye XII calende van october, ende worde in de Domkerke eerliken begraven.
Auteursrechtelijk beschermd