Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die opsetten ende aenslagen de here Jacob van Lichtenburch maecte tegen die van Uutrecht.
Dat XXIIII capitel.

Omtrent dese selver tijt worde heere Jacob van Lichtenburch, heren Jacobs soen van Lichtenburch, dye verslagen was, als voorseyt is, ghebannen uuter stat van Uutrecht, waerom here Jacob met enyghe sine vrienden ende mede hulperen van Vianen op Sinte Martijns avont in den winter enyghe burghers uuter stadt van Uutrecht, die om provande ghetoghen waren, snellicken vervolcht, van Amersfoert tot Jutfaes toe, in meninghe dye te vanghen ende doot te slaen. Mer dye burgers weerden hem vromelicken, dat si ongescadicht uut sinen handen weder in die stat quamen. Ende des jaers daeran, als die burgers ter mercten trecken

[p. 195r]

souden, om haer comenscappe te doen, heeft hy se weder verlaecht om te bevechten; mer die burgers stelden hem ter weer, ende hebben hem verwonnen bi die brugge te Jutfaes³⁶¹; ende die burgers quamen mit groter eren ongescent weder in die stat van Uutrecht³⁶².

361 Infaes ABC.

362 Uuerecht AB.