Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den doot grave Jans van Henegouwen van Hollant, Zeelant ende Vrieslant, ende van den edelen die doe waren.
Dat XXIII capitel.

Grave Jan van Henegouwen ende van Hollant, als hi hoerde van die grote victorie ende triumphe die here Willem, grave van Oestervant op die Vlamingen hadde gehadt, is hi seer verblijt gheweest, ende is corts daerna gestorven int jaer M III C vijf, op die anderde ijdus van september, ende wort met groter eren tot Valenchijn in Henegouwen begraven. Hi regierde dat graefscap van Hollant, Zeelant ende Vrieslant vijf jaer lang. Ende Phillippe, zijn wijf, die graefinne, starf daernae ende wort bi haren man begraven. In desen tiden waren vele vrome heren, ridderen ende sciltknechten in den lande van Hollant, daer dye opperste ende vernaemste of waren Gwije, heer van Aemstel ende van Woerden, ende naemaels biscop van Uutrecht, broeder des voorseyden graef Jans van Henegouwen ende van Hollant; Johan zonder Genaden, grave van Oestervant; Willem, na hem grave van Oestervant; Johan Beadmont, grave van Bloijs ende Swessen, alle drie broeders ende sonen grave Jans van Heneghouwen ende Hollant. Dirc die Goedertieren, here van Bredenroede; Willem ende Dirck, zijn broederen; Dirc, here van Teylingen; Johan, here van Hoesden; Johan, here van Arkel; Huge Butterman, here van Boetersloot; Aelbrecht, heer van Voorne; Claes, heer van Putten ende van Strenen; Johan, heer van der Lecke ende Polanen; Johan, here van Hokelom; Otte, here van Asperen ende Accoij; Gijsbert, here van IJselstein; Henric, burchgraef van Leiden; Dirc, here van Wassenaer; Henric, here van Vianen; Claes Perzijn; Dirck van Haerlem; Witte, deerste here van Haemstede in Zeelant; Claes van Cats; Pelgrom, here van Lederdam ende Haestrecht; Willem van Egmont, sciltknapen³⁵⁹; Jan, heer van Elshant; Johan, heer van Drongelen; Dirck van Leyenburch; Jacob van Woude; Gerrit van Heemskerck; Gerrit van Raephorst; Gerreit van Poelgeest, heer van Hoemade; Simon van Benthem; Wolwijn van Sassen; Adam³⁶⁰ van Scotlant; Baldewijn van Naeldwyck; Floris van Duven; Floris van Tol, allegader vrome ridderen; Willem van Haerlem; Wouter van Assendelf; Jan van Zijl; Claes van Adrichom; Wouter uuten Wijck, sciltknapen, met veel meer andere heren ende sciltknapen, dye uutgelesen ende vroom ter wapenen waren. Here Claes Persijn voergeseit vercofte doen ter tijt den cloester van Marienghaert in Vrieslant, een groot stucke lants ende eylant geheten Marken. Ende hiernae, als grave Willem van Hollant, der keyserinnen broeder van Romen, bi Staveren in Vrieslant versleghen was, soe dede die keiserinne alle der Vriesen ghoeden die si in Hollant legghen hadden toeslaen, ende vercofte dit eylant van Marken vele versceyden coepluden. Ende als hertoghe Kaerle van Burgongen grave van Hollant geworden was, quam die abt des voorseiden cloesters mit die brieve van der copinge heren Claes Parsijn, ende begeerde dat eilant weder te hebben; mer hi en konde niet vercrigen.

359 sciltcknapen AB.

360 A niet te lezen door vlek A.