Hier begint die XXII divisie ende heeft XXXIIII capitelen.
Anno M III C XVI.
Paeusen.
Dat I capitel.
Johannes die XXII was die CC V paeus; hi was een Wael van cleyne geslachte. Sijn vader was een schoelapperGa naar voetnoot363, als Antoninus scryvet. Hi was een man van cleine persone, mer van groter scyencien ende herten. Op een tyt quam tot hem zijn moeder, als hi eerste paeus was geworden, een arme simpele vrouwe, die welken sijn heren mit zyden clederen om der pauesliker eren hadden gecijert ende bereyt; doen vraechde die paeus, mit wat habijten zijn moeder ware gecleet; doen seyden si: 'Mit zijden clederen.' 'Neen,' sprac dije paeus, 'dat en is mijn moeder nyet; want mijn moeder is een simpel slechte vrouwe, ende en wist nije van zijde te seggen.' Doen toghen si haer weder aen slechte clederen, ende brochten se voer den paeus; doen stont hy op, ende custe sijn moeder, seggende: 'Dit is mijn moeder, die mi ter werlt heeft gebrocht!' Dese paeus dede voel voer dye Heylighe Kercke. Ende als hy XC jaer out was, starf te Animien, als hi dat paeusdom hadde beseten XIX jaer, IIII maenden. Hi liet also groten scat van gout ende silver after, als yement van sijn voersaten hadden gedaen. Dese Johannes die XXII heeft uut dye boeken sijnre voervaders verghaedert ende ghevonden dat in Sinte Benedictus Oerde hebben gheweest XXIIII paeusen; cardinalen: C ende LXXXIII; archibiscoppen M IIII C; LXIIII biscoppen; III M V C ende II abten; XV M ende LXX heyligen: gecanoniseert V M V C LV.
Item. Die XXI twistscisma in der Heiliger Kerken van Romen was tusschen desen Johannem die XXII ende enen gheheten Petrum de Corbario van der Minrebroederen Oerde. Dye saeck des twistes was die tijrannicheit des keysers Lodewijcxs, welke keiser begeerde te breken die eendrachticheitGa naar voetnoot364 der Heiliger Kerken, omdat dye paeus hem in den ban gedaen hadde. Ende daerom heeft hem die keiser seer opghetoghen, ende heeft hem geeert als een god; mer hy en vorderde niet, want dese Petrus quam daernae ende viel voer des paeus voeten, biddende genaede, dien hi verwerf. Nochtans was dese Petrus alle zijn leven lang geacht als een viant der kercken.
Auteursrechtelijk beschermd