Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

[p. 192v]

Hoe dat Zyrixzee derdemael worde belegen.
Dat XVII capitel.

Als Gwije Dampier uut Vlaenderen dese leide mare verhoerde van die grote victorie heren Wittens van Haemsteden, is hi mit groter confusen haesteliken uut Uutrecht getoghen, ende heeft mit een groot, swaer, machtich heer van volc die ste van Zijrixzee derdenmael belegen, ende heeft se dagelicxs doen anvechten ende bestormen mit magenen, mit blien, mit beren, mit catten ende mit menigerlei andere instrumenten, daer hi die stede stadelicken mede anvacht ende bestormde. An die noortside van der stede hadde hi doen oprechten twe grote blyen, die uutermaten grote stenen in die stede worpen; ende an dye suytside hadde hi enen uutnemende grote blye doen rechten, om die stede mede te quetsen ende te vernielen. Die van binnen en waren niet min versien van starke vrome mannen van wapenen ende andere instrumenten ten oorloge dienende, want si hadden doen rechten binnen haer stede drie uutermaten grote blyen, daer sij haer vianden seer mede quetsten ende haer stede mede bescermden. Het is gesciet, dat op een dach de vianden enen groten swaren steen binnen die stede worpen; doe sprac daer een ambochtsman, die van der konsten was om stenen te worpen: 'Haelt mi hier den stenen bode; ick sal hem weder senden sinen here, die se ons gesonnen heeft'; ende si brochten hem denselfden steen, ende hi werp hem op enen grote blide, die voer die stede stont, ende brac hem an stucken. Ende des meesters hant, die daerbi stont, worde van den steen gebroken ende seer gequest. Daernae³⁵¹ dede Gwije Dampier brengen vele stroe, riet ende risen, ende liet die haven stoppen, ende verwachte den tijt dat hy daerover soude mogen gaen, ende beclimmen die mueren³⁵² van der stede; ende den tijt gecomen wesende, heeft hi alle zijn volc geboden dat si opten middachstont die stede souden beclimmen. Ende die Vlamingen zijn angecomen, brengende met hem stroe, hoy ende risen; ende hebben daer die vesten ende graven mede gevolt, ende zijn eendrachteliken mit groter macht an die stede gevallen, in meninge die te winnen ende geringe te overvallen. Mer haer hoop wert haeste te niet gedaen; want die poorters ende ingeseten namen haer wapenen, ende liepen haesteliken aen die muren ende vesten, ende clommen op die toornen, ende setteden haer vrome jongelingen ende cloucke mannen an die muren om die stede te bescermen, ende weerden hem vromeliken. Die vrouwen brochten den mannen, die an die muren stonden, haer gescutten ende stenen mit groten hopen, opdat si te crachtelicker ende langer souden in den stormen volherden. Die poorters scoten so vreseliken uuter stede tot haer vianden in, dat si niet alleen van den muren verdreven worden, mer ontelliken worden si bi groten hopen gescoten ende geslegen. Ende wanneer daer brant in die stede was van dye vierighe pijlen, die si daerin scoten, liepen die vrouwen ende maechden ende lesten dat vier ende brant. Dit gesciet wesende heeft Gwije

351 daerne AB.

352 muerrn AB.

[p. 193r]

Dampier doen rechten een groot instrument voer die stede, genoemt een catte. Ende stont an die noortside van der stede, uutten welcken die van binnen seer benaut ende bevochten worden van den Vlamingen. Dese catte was hoech, ende men mocht daerof sien al dat men in die stede dede. Daerna hebben die Vlamingen die stede angestormt enen gansen helen dach lange, mit scieten ende werpen. Daerentegen hebben hem die poorters also vromeliken gehat mit scieten, mit werpen van blijen ende stenen, dat sij die Vlamingen van hem weerden also cloekeliken, datter op enen dach boven M ende VIII C Vlamingen voer die stede bleven geslagen ende verdrenct. Ende als die Vlamingen aldus vromeliken van den poorters waren verdreven ende die vlucht hadden genomen, zijn die poorters uutgelopen in die vesten ende graven, ende haelden daeruut alle dat stroe, riet ende risen, daer si dye graven mede gevolt hadden, ende maecten dye weder scoen, ende gaven dat haer beesten ende onderhilden se daermede alle den tijt dat dat belegge duerde. Op dese tijt was daer een smit in der stede, die hem vermat alsulc gescut te maken, daer men die catte mede soude doen barnen, die de Vlamingen opgerecht hadden. Dwelc also is gesciet; want die poorters scoten dat vier op dye catte, ende si bestonde te barnen. Ende als die Vlamingen dat sagen, liepen si om dat vier uut te doen; mer dye poorters scoten so dicht ende vreselicken op die Vlamingen, dat si daer niet bi en dorsten comen. Ende dese brant sloech so hoge in die lucht, dat men die lichteliken sach tot Sciedamme ende Vlaerdingen; waeruut dat zommige vermoeden, die van desen brande niet en wisten, die stede van Zyrixzee en ware gewonnen ende an brande gesteken.