Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die Vlamingen uut Hollant verdreven worden.
Dat XVI capitel.

Als here Witte van Haemstede mit luttel wapentuers binnen die stede van Haerlem was gecomen, heeft hi sinen bannier mit rode leuwe ontwonden. Terstont zijn by hem gecomen alle dat volc uut Kermerlant, uut Waterlant ende veel uut Oest- ende West-Vrieslant, lovende God, dat si enen hoefman hadden van den rechten bloede van Hollant gecomen wesende; ende als here Witte sach dat si alle waren bereit mit hem te gaen, is hi uutgegaen mit ontwonden blinkende bannieren, mit een vreselic geluit van basunen. Ende als si quamen bi Hillegom, is hem daer te mote gecomen mit een grote menichte van Vlamingen die president van Vlaenderen; ende daer gevil enen groten strijt, overmis die vreselike slagen ende dat grote gecrij dat daer was van dengenen die geslagen worden. Ende als die Vlamingen dus verslagen waren, quamen die Vriesen, ende togen hem uut alle haer cleder, ende worpen se op een hoop. Ende al spottende seiden si: 'Dese hoop der Vlamingen sal voertan een seker teiken wesen, of si hier omtrent bi avonturen quamen.' Ende dese wech wort op huden noch desen dach ghenoemt Out Mannepat. Dit gerucht is terstont over al Hollant openbaer geworden, ende als men dit tot Delft hadde vernomen, was daer een vroem welboren man, gheheten Ockenberch, ende nam die bannier in die hant, ende riep: 'Hollant, Hollant!' Ende dat volc is te samen int harnas gelopen, ende verdreven alle die Vlamingen uut haer stede, ende slogender mit allen vele doot. Die van Delft togen tot Leyden, ende reisden voert gelic na der Goude, ende overvilen daer die Vlamingen, vangende ende slaende, ende namen haer poorters weder die daer gevangen lagen. Hierentusschen is heer Witte van Haemstede mit alle zijn heer, mit ontwonden bannieren ende blasende hoornen, gecomen tot Leyden, ende hebben met groter wreetheit vele van den Vlamingen daer geslagen ende verjaect, ende liepen mit groter haesten na Delft, menende daer vrij te wesen. Mer heer Witte heeft se snelliken vervolcht, vangende ende slaende alle die hi crigen konde; ende comende tot Delft, worter wijf hondert van den Vlamingen geslegen, in een strate dye noch tot huden opten dach hiet die Vlamingstraet. Ende zommige liepen na die vesten ende graften, om over te swemmen; mer si verdrencten alle. Aldus heeft here Witte van Haemsteden met groter eren weder gewonnen heel Noort-Hollant, daeruut verjagende de Vlamingen, ende behilt van hem enen groten roef. Op desen tijt ging heer Clas van Cats, ridder, die castelein van den huse van Scoenhoven was, van Gwyens wegen in die stede beneden, om te besien wat men daer dede. Die poorters liepen terstont te samen, ende vingen hem, ende senden terstont an heer Wite, dat hi wilde comen tot Sconhoven; ende hi quam terstont met veel volcs³⁵⁰ van wapenen, ende beleide dat huis al omme, ende rechte daervoer een grote blije, daer hi die van den huse sere mede quelde, dat si hem ten lesten opgeven mosten; ende aldus heeft here Witte dat huis ingecregen ende die Vlamingen met groter crachte daeruut verdreven.

350 vocls AB.