Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die grote victorie tegen den Vlaminghen.
Dat XVIII capitel.

Hierentusschen heeft dye jonge here Willem, grave van Oestervant, een groot volc van wapenen uut Hollant ende Vrieslant vergadert, om te ontsetten die stede van Zijrixzee, ende heeft gescreven an Phillips³⁵³ die Scoen, coninc van Vrancrijc, dat hi hem wilde bistant doen tegen die Vlamingen. Ende die coninc heeft doen bereiden tot Calys driehondert ende vijftich groter scepen, ende vijf galeyen, diewelken hi oversende mitten ammijrael van der zee, mit gulden bannieren ende trompers, mit groot volc van wapenen. So ist dan geboert in dit jaer van M CCC ende IIII, op Sinte Laurens dach, dat dese scepen uut Vrancrijc ende here Willems scepen, grave van Oestervant, tesamen zijn gecomen, dat si de Vlamingen van den belegge van Zyrixze verdriven souden, ende die stede ontsetten. Die Vlamingen hebben hem daertegen geset, ende hebben een groot scip doen bereyden ende dat toegemaect, ende gevolt mit spec, olij, salpieter ende swavel, ende hebben dit scip angesteken, ende lieten dat driven voer winde ende wagen mitten getije op dat Hollantse heer, opdat, overmits desen onverwintliken³⁵⁴

brande, de ander scepen souden ontsteken worden ende dat heer mochte worden verstroyt. Mer die wint is omgegaen ende dat barnende scip is wedergekeert mitten getije ende vloede van der zee, ende is comen driven onder der Vlamingen scepen. Ende die dit scip bestierden zijn jammerliken van den brande al levende verbrant ende verdronken. Dye Fransoysen ende Hollanders dit siende, hebben enen moet gecregen te strijen ende begonden mit blinckende bannieren ende mit blasende basunen dat Vlaemsse heer an te vechten. Daertegen hebben hem die Vlamingen mit scieten, met slingeren ende met werpen een helen dach ende nacht vromelicken tegen haer vianden bescermt ende verweert. In desen stride was dat breken der glavien, dat geluit der swaerden, dat clincken der helmen, dat werpen der stenen, dat bersten der armborsten ende dat vreseliken geluit ende gecrij der vechtender mannen ende der vromen wapentuers also groot, dat men dat vervaerliken geluit hoerde over drie milen weechs. Ende ten lesten worden die Vlamingen alsoe vermoeijt, dat si wikende worden ende namen de vlucht, dien die Hollanders stouteliken navolchden³⁵⁵, vangende ende slaende, ende worpen se mit groten hopen in die see ende verdroncken. Ende Gwie Dampier worde int einde van den strijt ghevangen ende worde bi den ammirael van Vrancrijc levendich in Vrancrijc gesonden, ende worde aldaer mit Gwie Dampier, grave van Vlanderen, ende mit sijn andere broeders, ghevanghen gehouden. In desen strijt bleven doot van den Vlamingen dye verslegen ende verdroncken worden wel hondert dusent man,

353 Phillis AB.

354 overwintliken AB.

355 nawolchden AB.

[p. 193v]

ende daer worter vele gevangen, die die grave van Oestervant mit dusent ende hondert grote scepen ende mit tnegentich costelike papiljonen ende tenten mit hem nam. Ende als dye grave van Oestervant dese grote victorie van sine vianden hadde vercregen, is hi binnen Zijrixze gecomen, ende daer worde hem geseyt datter noch wel ses dusent Vlaminghen in die dunen lagen. Die poorters, dye in desen strijt niet geweest en hadden, zijn met alle haer macht uutgetogen na dese Vlamingen om die te bevechten; mer si staken dye handen op, ende en begeerden niet te striden, ende worden gevangen genomen ende tot Zijrixzee gebrocht. Ende mit dese worden alle die Hollanders ghelost die in Vlanderen dus lange gevangen hadden gelegen. Ende tot eender ewige memorie, soe wert noch huden op den dach des anderen dages na Sinte Louris dach een vierlike ende devote processie gedragen mitten Heilige Sacramente om die stede van Zijrixzee, God lovende ende danckende van die bescerminge ende victorie dye si hadden gehat tegen haer vianden.