Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die avonture die die Vlamingen hadden tegen haer vianden in vele plaetsen.
Dat XI capitel.

Daerna, in den jaer Ons Heren M CCC ende III, so zijn grave Jan van Namen ende Gwije zijn broeder getogen met een groot machtich heer van volc, dat si weder hadden vergaedert mit here Jan van Renesse in vele plaetsen des graefscaps van Vlaenderen ende daeromtrent, berovende, vangende ende slaende³⁴⁴ alle die mitten Fransoysen toege-

344 slaeden AB.

[p. 191r]

vallen ende houdende waren; ende dye avontuer was seer mit hem, ende hebben oec ten lesten mede toegetast ende bescadicht de Hollanders ende Zelanders, dewelke terstont haer volc deden vergaren, ende maecten roofscepen toe wel versien; ende in wrake here Jans sonder Genaden, grave van Oestervant, die si mede geslegen hadden, hebben si die Vlamingen berooft, gebrant ende geslegen, te water ende te lande, mit groter wreetheit, daer si conden ende mochten. Ende na Jans doot sonder Genaden is Willem, die ander soen, geworden grave van Oestervant; want die outste soen des grave van Henegouwen wort altijt geheten grave van Oestervant.