Van een wonderlic ding dat na desen strijde gesciede.
Dat X capitel.
Hierna ses jaren, als desen strijt was gesciet, sijnder gecomen enige luden dye hem seiden te wesen de heren ende princen die men vermoerde in desen stride van Cortrijc verslegen te wesen. Die ene seide dat hi was grave Govert van Viersen; die andere sey hem te wesen die graven van Heu; die derde die here van Craijnen, ende so voert meer andere. Ende dese voerseide brochten also vele woerden ende redenen bi, dat men in vele plaetsen gheloefde dattet also was. Ende die hem seyde te wesen Govert, grave van Vierson, worde van der graefinne ende van alle den ondersaten voer een grave van Vierson ontfangen. Ende dede van stonden an alle de scepenen ende officieren in den graefscappe van Vierson ende in andere plaetsen zijnre heerlicheden ofsetten, ende andere daerin settende, die hem beliefden. Ende dede oec ofnemen die scilt ende wapen desselven graefs van Vierson dye over zijn graf hing te Brusel totten Minrebroeders, seggende dat hi noch levede. Ende die greafinne desselven graef Goeverts huijsvrouwe nam hem tot enen heer ende man, ende sliep daerbi lange tijt, ende en wist anders niet, ten was haren getrouden man, die grave van Vierson. Mer namaels ist openbaer geworden, als dat dese die heren ende mannen niet en waren die si seiden te wesen, zijn si allegader gevangen geworden ende zijn om der eerberheitswillen deser voerseider edelre vrouwen in ewiger gevangenissen gehouden totter doot toe.
Auteursrechtelijk beschermd