Van die oorlogen tusscen Vlaenderen ende Hollant.
Dat XII capitel.
In den jaer Ons Heren M CCC IIII heft Gwije, des graven soen van Vlaenderen, uut groter victorien ende fortunen hem verheffende, ende uut ingeven heren Jans van Renesse, vergadert een groetGa naar voetnoot345 machtich heer, ende is getogen ende gaen legghen in Cazant, verwachtende die wint om over in Walcheren te trecken, ende mit crachten in te winnen. Ende Willem, grave van Oestervant, dit vernemende, heft terstont veel volcs vergadert uut Hollant, Zeelant ende Vrieslant, ende is onversien ende mit een goeden winde ghecomen in Cazant, ende heeft daer enen groten strijt gevochten tegen den Vlamingen; ende daer worter mit allen vele geslegen ende gedrenct; ende is weder mit groter eren ende victorien gecomen in Zeelant. Ghije heeft wederom vergadert veel Vlamingen ende volcs van wapenen, ende is anderwerft gecomen in Zeelant om dat lant te bescadigen. Denwelken die jonge graef WillemGa naar voetnoot346 anderwerf hen heeft tegemoet gegaen, ende worde overmits heimelicke verraderie eens ter Vere, ende eens tot Aremuden op enen dach verwonnen, ende is haesteliken uuten stride gevlogen, ende is gecomen tot Zijrixzee om ander versch volc van wapenen te vergaderen. Denwelken Gwije mit die Vlamingen zijn gevolcht, ende comende voer Middelburch heeft hi die stede gewonnen, ende heft daerna die stede van Zijrixzee belegen VI weken lanc, ende scarpeliken mit scieten ende werpen van stenen angevochten ende bestormt. Ten lesten heeft grave Willem heymeliken een van de poorten opgedaen, ende is vromeliken tegen die Vlamingen uutgegaen; ende hefter enen groten strijt gehat; want daer bleven boven die XV hondert Vlamingen ghevangen, geslegen ende verdrenct, ende daer wort een bestant gemaect een maent lang, behoudelic dat men Zijrixzee niet vaster maken en soude noch bebolwercken, dant nu en was. Dit gedaen sijnde is grave Willem getogen in Hollant, om ander, meer volcs ende bistant. Dat bestant uutghegaen wesende, zijn dye van Zijrixzee mit alle hoer macht getogen tegen die Vlamingen de binnen Middelburch lagen, ende hebben die stede weder mit cracht gewonnen, ende veel Vlamingen versleghen, ende sijn met groter eeren ende triumphen weder tot haer stede gecomen; ende ontboden grave Willem dese blide nijewe tidinge, dyewelke wedergekeert is na Zijrixze, ende heeft veel Vlamingen geslegen die daer omtrent mit heer Jan van Renesse verborgen laghen, ende verjaechde se uut Zeelant. In desen strijde worde grave Willem van Oestervant ridder geslagen, ende mit hem noch XLVIII, onder welke Witte, deerste here van Haemsteden, grave Floris' soen, een of was.
Auteursrechtelijk beschermd