Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe de grave van Vlaenderen gevangen worde.
Dat VIII capitel.

Int jaer Ons Heren M CCC ende II, als Philippe, die joncxte dochter van grave Gwije Dampier van Vlaenderen, dye een oem was van grave Jan van Henegouwen ende van Hollant, ondertrout ende gegeven was des conincs soen van Engelant; Phillips die Scoen, coninc van Vranckrijc, dit willende benemen, heeft notabile

[p. 190r]

mannen ende heren gezonnen om dese dochter, als dese Philippe voorseit, gecomen was tot Parijs, verselt wesende mit XXX ridderen ende XX edele joncfrouwen, so worde si terstont vergeven, ende de XX joncfrouwen worden geworcht ende in die Zeyne geworpen, ende die XXX ridderen worden an galgen gehangen. Ende daer rees op een groot, swaer, fel oorloge tusscen Vrancrijc ende Vlaenderen. Ende die grave Gwie van Vlaenderen is in Vrancrijc gecomen op goeder geloven ende sekerheit, mit vijftich edele ridderen ende mannen om pays ende vrede mitten coninc te maken. Ende daer wesende, wort hi gevangen mitten grave Robbrecht van Nijvers, sinen outsten sone; ende mit Willem³⁴⁰, here van Nijvelle, sinen anderen sone, ende mit alle sine edelen en heren, die daer mit hem waren gecomen; ende de coninc sende grave Jacop van Simpol, der coninginnen oom, om Vlaenderen te regieren van sinentwegen; dyewelke dat gemeen volc swaerliken ende groteliken verdructe ende belaste, ende worde ten lesten, overmits enen oploep van den gemeenten, mit groter confusien ende scanden uuten landen van Vlaenderen verdreven ende verjaecht. Ende die Vlamingen hebben ontboden grave Johan van Namen. Ende Gwije sinen broeder, des voornoemden gevangen grave Gwien sonen, ende hebben se gemaect haer voechden ende bescermers des lants van Vlaenderen. Ende die heren metten ghemene steden ende landen hebben hem vromeliken tegen den coninc gheset, ende haer lijf, goet ende lant bescermt.

340 Willen AB.