Van een teiken in der lucht, ende hoe graef Jan in Henegouwen reysde.
Dat VII capitel.
Daerna is grave Jan getogen in Henegouwen, ende heeft sinen oudsten soen, Jan sonder Genaden, grave van Oestervant, bevolen dat regiment van Zeelant, ende Willem, sinen anderen zoen, heft hi bevolen te regeren dat lant van Hollant ende Vrieslant, opdat hi voert te rusteliker sonder rumoer soude mogen leven. In desen tiden openbaerde in Hollant een wonderlic teiken, dat welke een zonderlinge voersage was van eenre toecomender droefnissen ende verdryet. Ende een man sittende te paerde, heft hem openbaert in der lucht, vermanende alle dat volc dat si haer wapenen nemen souden ende lopen opten over van der zee, om die vianden te keren ende te wederstaen. So is dan alle dat volc ter zeewaert gelopen om haer vianden te bevechten, ende si sagen die zee mit ontelliken scepen vervolt. Mer dye scepen zijn in een ogenblic altesamen verswonnen ende vergaen, ende diergeliken die man mitten paerde is hem uuten oge gevaren; welke visioen doentertijt een heilich man heeft beduit ende bewijst, seggende: 'Gelikerwijs als die zee vervolt is geweest van scepen ende zijn geringe vergaen, also sullen die Vlamingen comen mit ontalliken groot volc van wapenen ende sullen Hollant, Zeelant, Vrieslant ende Uutrecht winnen ende onder hem brengen, mer haesteliken ende scieliken als een roec voer den wint sullen si weder worden verjaget ende verdreven', als men horen sal.
Auteursrechtelijk beschermd