Hoe here Jan van Renesse uut den lande verdreven worde, ende van den anslach die hi maecte mitten coninc van Romen tegen graeve Jan van Hollant ende van Henegouwen.
Dat III capitel.
In den jaer Ons Heren M CCC ende een heeft grave Jan van Henegouwen ende Hollant groot volc vergadert van wapenen, ende is gevaren in Zeelant tegen here Jan van Renesse; ende heeft hem uut Zeelant crachtelic verdreven ende verjaget. Here Jan aldus verdreven wesende, is gecomen tot coninc Aelbrecht van Romen, versoekende an hem hulp ende bistant, seggende dat de graefscap van Hollant ende Zeelant gecomen ware an den Roemschen Rijcke, omdat joncheer Jan gestorven was sonder kinderen after te laten. Die coninc is heymelic nedergecomen na Hollant, ende heeft brieven gesonnen ende doen gaen doer die landen, ludende aldus: Kenlic si allen menschen, dat Aelbrecht, die onverwonnen coninc van Romen, de heerlicheden van Hollant ende Zeelant incorporeren ende andoen wil den Roemschen Rike, dwelke wilen eer coninc Kaerle dye Caluwe ende keiser van Romen, tot een leen ghegeven heeft Dirck, den eersten grave. Soe is dan int selver jaer dese coninc Aelbrecht nedergecomen tot Nijmmagen om onder sine dominatie te brengen die graefscap van Hollant ende Seelant, mit hem brengende die aertsche biscoppen van Ments, van Trier ende van Coelen, mit veel heren baronen ende princen uut Duitslant. Daerentegen is gecomen grave Jan van Henegouwen, Hollant, Zeelant ende here van Vrieslant, met een groot machtich heer van volck, ende heeft sijn tenten nedergeslagen tot Bouswaerde, opten oever van der Walen, besoekende die rivier, waer hi best over soude mogen comen mit sijn heer, om den coninck te bevechten. Mer die coninc siende van den toern die veelheyt der bannieren ende dye starcheit der vechtender ende gewapender mannen der Hollanderen, meende dat heer Jan hem bespot ende verraden hadde, ende beducht wesende, toech hy afterwaert tot Cranenburch, ende woude des anderen dages wederom reisen in Oestenrijck. Die biscop van Coelen, om des coninc eer te bewaren, heeft naerstelic ghearbeit om een vrede ende pays te maken, ende heeft ten lesten een pays gemaect, als dat grave Jan soude den coninc enen eedt doen, ende soude die graefscap van Hollant ende Zeelant van hem te lene houden. Ende dit gedaen sijnde, zijn alle dye heren ende vorsten elc weder in zijn landt gereist.
Auteursrechtelijk beschermd