Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen anderen anslach dye here Jan van Renesse opnam tegen den grave.
Dat IIII capitel.

Die Zeelanders, die met here Jan van Renesse ghecomen waren om den coninc te helpen, quamen te late, ende lyeten haer scepen staen bi Hoesden, ende vlogen te voet na Vlaende-

[p. 189r]

ren, berovende stadelic die naeste dorpen ende landen in Zeelant. Mer grave Jan is hem haesteliken nagevolcht, ende heeft haer scepen verbrant, ende heeft here Jan van Renesse uut alle sinen landen gebannen, ende zijn goeden hem benomen, ende heeft die ghedeelt onder sine heren ende edelen, die hem trouweliken hadden ghedient. Here Jan van Renesse heeft zijn vrome wapentuers gesterct, vermanende dat si hem stoutelicken wilden helpen te bevechten de graefscap van Hollant, ende is gecomen tot Bergen an den Soem. Die here van Bergen is hem vromeliken mitten sinen tegengegaen in een strijt, ende daer worden omtrent wijf hondert man geslegen van heren Jans volc van Renesse, ende is geweken uuten strijt, ende quam op dat huys te Poroyen om hem daer te bergen ende te onthouden. Grave Jan, die op de tijt tot Dordrecht was, ende dit verhorende, heeft Jan, sinen outsten soen, grave van Oestervant³³⁶, met veel volcs van wapenen gesonnen tegen heren Jan van Renesse. Als here Jan van Renesse dat vernam, sprac hi tot sinen knechten: 'Dese Jan, grave van Oestervant, is een wreet ende fel man, sonder genaden, als die duvel; ende ist sake dat hi dat casteel ende ons verwint, so sal hy ons allegader dootslaen, geliken als hi dede alle dye hi vant opt slot te Berendorp, doen hi dat wan. Aldus ist beter dat wi allegader vlien ende den doot ontgaen, dan wi hier bliven den doot verwachtende.' Ende si sijn van daen gereist³³⁷ ende quamen in Vlaenderen; ende van die tijt voert, so worde des grave Jan van Oestervant geheten van allen menscen Jan sonder Genaden, want hi in alle sine daden seer fel, wreet ende ongenadich was. Here Jan van Renes, wesende in Vlaenderen, heeft een verbant gemaect mitten Vlamingen, ende heeft mit hem genomen een deel volcx van wapenen, ende is angecomen Ter Goes, om dat stedeken mittet slot te becrachten ende in te winnen. Dye van Reimerswale dit vernemende zijn hem te gemoete gevaren mit alle hoer macht, ende geviel een strijt datter omtrent VIII C Vlamingen bleven geslegen, ende die ander namen de vlucht; ende here Jan³³⁸ is nauwelic mitten live ontghaen uut sine vianden handen.

336 oesternant AB.

337 grreist AB.

338 Jas AB.