Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van grave Jan van Henegouwen, die XVIII grave van Hollant, Zeelant ende heere van Vrieslant.
Dat anderde capitel.

Doe joncheer Jan sonder oer te laten aldus ghestorven was, quam die graefscap van Hollant an grave Jan van Henegouwen, sijnre ouder moyen zoen, dye grave Jans zoen van Avennes was gewonnen bi Alijt, coninc Willems suster, ende wert die XVIII grave van Hollant, van Zeelant, ende here van Vrieslant, ende voerde den roden leuwe van Hollant ghequarteleert teghen den swarte leuwe van Henegouwen. Dese grave Jan hadde IIII broeders, als Botzaert, biscop van Mets; Jan, biscop van Cameriken; Gwije, canonick van Camericken; ende Floris, prins van Morianen. Dese grave Jan gaf Ghije sinen broeder int beghinsel van sijnre heerlijchede die heerscappie van Aemsterlant ende van Woerden, metten hoghe ende laghen gherechte, met voerwaerden dat hi die van den graefscap van Hollant in rechten leen houden soude, uutghenomen dat Reygherbosch in Aemsterlant; ende die manscap aldaer hilt die grave aen hem. Ende dese voerseyde heerscappie soude hy houden ende ghebruken mit alle horen toebehoren totdat hy storve of dat hem een bisdom ghegeven worde, of alsoe ghoet als een bisdom, ende dan souden dese goeden weder an die graeflicheyt comen. Ende des nam grave Jan brieven van sinen broeder, dat hi zijn wederseggen daeran hebben soude, opdat hi die

[p. 188v]

graeflyckhede van Hollant niet en onterfde. Dese Ghije gaf der stede van Aemstelredam³³⁵ veel vrijheden van koeren ende rechten, daer men dye stede mede regierde; ende hi wert naemaels byscop van Uutrecht gecoren; ende als hi doot was quamen dese II heerlicheden weder an de graeflicheit van Hollant, als ghi na horen sult. Dese grave Jan hadde te wive Phillippe, des graven dochter van Lutxenburch, daer hi an wan Jan sonder Genade, grave van Oestervant, dye te Cortrijc in den strijt bleef verslagen; Willem, die na hem grave worde; Johan van Beamont of Bellemont, grave van Blees ende Swesse; heren Henric, canonic van Cameric; Margriet, graefinne van Atrecht; Adelheit, graefinne van Cleermont; Marie, graefinne van Barbanoys, ende Machtelt, vrouwe van Nyele.

335 Aemstelredaz, AB.