Van den doot grave Jans van Hollant, ende hoe Gijsbrecht van Aemstel weder uut Hollant verdreven worde.
Dat XIII capittel.
In den jaer Ons Heren M ende CCC was grave Jan van Hollant tot Haerlem, daer hy sere siec worde ende starf aldaer opten IIII kalende van november, als hy dat graefscap van Hollant ende Zeelant hadde geregeert omtrent vier jaer lang. Dese joncheer Jan was allene die eerste onder die graven van Hollant die sonder kinder ende ridders name gestorven is. Ende hi worde gebrocht tot Reynsburch int cloester, ende wort bi sinen vader met betameliker uutvaert, met helm ende scilt begraven. Ende die graefscap verstarf opten grave Jan van Henegouwen als naeste oer. Dese graefinne, sijn huisvrouwe, joncfrouwe Elisabeth, is na haer mans doot weder overghereyst in Engelant tot haren vader, ende worde te wijf gegeven den grave van Erffoert.
Na des graven Jans doot quam Gijsbrecht van Aemstel ende begreep weder dat stedeken van Aemstelredam, ende began dat mit houten bruggen, vesten ende toornen te starken ende vast te maken. Dye van Haerlem mit den Waterlanders dit vernemende, sijn mit alle haer macht uutgetogen ende hebben den voorseiden Gijsbrecht uuten landen gejaecht ende verdreven, ende staken dat vier in dat stedeken, ende verbranden alle die bruggen ende houten toornen tot asschen toe, ende slechtent, ende brakent voert of.
Auteursrechtelijk beschermd