Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat here Wolfert van der Vere ende de balju verslagen worden.
Dat XII capitel.

Daerentusschen so heeft here Wolfert van der Vere, als een verwoet ende fel man, den Hollanders willen beswaren mit eenre nyewer munten ende scattinge, ende sette alle ding nae sijns selfs belieften ende goetduncken; waerom hi seer versmaet ende gehaet worde. Want het is op een tijt geboert, dat de grave was in sGravenhage, ende mit hem here Wolfert van der Vere; ende daer is een groot rumoor ende oploep der heren ende edelen van Hollant gesciet, te samen lopende, roepende ende seggende: 'Siet, onse viant is hier nu tegenwoerdich! Hoe lange sullen wi aldus van hem wesen geregeert³²⁹ ende benaut?! Laten wy hem dootslaen ende besien, wat hem sine anslagen ende nijewicheden, daer hi ons aldus lange mede heeft gemolesteert ende belastet, baten ende helpen sullen.' Deser ende dyergeliken spraken ende seiden si dagelixs onder malcanderen, ende hebben ten lesten enen tijt, dach ende ure geset, ende een vergaderinghe ghemaect, dat si van desen here Wolfert ende sine onbehoerlike werken wrake doen wouden. Dye here Wolfert van der Vere dit vernemende, is des smargens vroech voer dage mitten grave uut Den Hage gereist na Sciedam, ende is in een scip gegaen, om over die Mase te varen in Zeelant. Die Hollanders dit vernemende, zijn terstont hem nagevaren, ende hebben hem mit macht wederom gebrocht, ende wouden here Wolfert geslagen hebben. Mer het worde om des graven wille gelaten, ende si hebben den grave met here Wolfert gebrocht binnen Delft, ende zijn ghegaen op een groot stenen huys, staende tenden die Choerstraet, op een hoec van der stege, wanende daer vrij te wesen, om niet geslegen te worden, daer hi seer voer beducht hadde geweest. Ende siet, terstont worde daer een oploep ende rumoer voer dat huis daer si op waren, ende riepen allegader mit luder stemmen: 'Geeft ons here Wolfert, of wi sullen den brant in dit huis steken ende verbarnent mit alle die daerin zijn.' Ende die daerbinnen waren, vervaert wesende, hebben si here Wolfert sonder harnas wesende ter veinster uutgeworpen, ende worde terstont doerhouwen ende dootgeslegen. Op dieselve tijt is Alant, die balju, uut vresen van de van Dordrecht, zijnre vianden geweken op dat huis te Craeiensteyn, ende worde daer een wyl tijts³³⁰ onthouden. Dese balju,

329 geregeet AB.

330 tijes AB.

[p. 187v]

als here Wolfaert³³¹, sijn bescermer ende dye hem te recht hadde gehouden, doot was, worde van der gemeenten van Dordrecht mit lelike ende scantlike woorden seer gediffameert ende versproken, ende is ten lesten van henluden ombesingelt ende beseten. Ende is corts daerna van den huse gegaen, ende is sine vianden gepresenteert, ende worde mitten sinen in een scip geset ende tot Dordrecht gebrocht. Ende so geringe als hy uuten scepe was, worde hi mit twe sine broederen van den gemeenten jammerlicken gedoot ende geslagen.

331 Volfaert AB.