Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den twedrachte die was tusschen grave Jan ende die van Dordrecht.
Dat XI capitel.

Daerna ist geboert dat Alant, die balju van Dordrecht, woude sitten mit die scepenen van Dordrecht in stille waarheit van zommige saken ende misdaden de tot Dordrecht waren gesciet. Daer die scepen van Dordrecht op antwoerden, als dat der stede rechten ende privilegien dat niet en vermochten, van genen saken, groot of clein, daerover te staen dan metten scout van Dordrecht. 'Nochtans, behoudeliken onse oude rechten ende privilegien, sullen wi dese reise mit u sitten, niet om te ordelen ende rechten, mer om te ondersoeken.' Dese stille waerheit begonnen wesende, quam grave Jan selver tot Dordrecht mit heer Wolfaert van der Vere, ende begheerde in scrifte te hebben der poortersnamen die misdaen hadden. Daer de poorters van der stede op antwoerden: 'Alle de binnen der stede iet misdon, dat sal men binnen der stede rechten, na inhout hare vriheit ende privilegien.' Waerom dat de grave toernich worde, ende reysde vandaen in sGravenhage. Die van Dordrecht met deser saken beladen wesende, senden enige notabele mannen uut haer ste-

[p. 187r]

de by den grave, ende presenteerden hem altijt tot sijnre belieften te staen ende van deser saken reden ende antwoert te geven. Die grave heeft hem een dach ende plaetste geleit binnen die stede van Delft; ende daer vergadert wesende, die here Wolfaert van der Vere ( des graven advocaet ende voerspraec ( heeft aldaer voer allen menschen begeert alle datgene dat voer geroert ende bescreven is. Doe seiden die scepenen totten grave, als dattet geconcludeert ende gesloten was mitten balju van Dordrecht, dat de saken die ghevallen ende gesciet waren binnen der stede, dat men dye rechten soude mitten scepenen ende scout van Dordrecht, ende niet by andere rechteren. Daer dye balju op antwoerde, dattet gelogen ware, ende woude daer oec yement tegen seggen, hi woude mit hem daer om enen camp anghaen ende wechten. Doe stont daer een scepen van Delft, ende seide: 'Ten behoert niet, dat men de rechten, vriheden ende privilegien van der stede setten sal om enen camp te vechten; want dan en waren si nyet tswaerts ende van geenre crachten.' Daer dye here van der Vere op antworde ende seide: 'Ghi heren van Delft, en wilt u niet onderwinden van mijns heren des graven saken, want hy weet wat hi doen of laten wil.' Ende also bleef dese sake staen, ende elck toech weder thuijswaert. Ende wenich tijts daerna dede grave Jan die stede van Dordrecht ontsegghen, ende hi beval here Witte van Haemstede, sinen bastertbroeder, dat casteel te Putte, om daeruut te oerlogen. Ende here Claes van Cats is van des sgraven wegen geset cappetein te wesen tot Abblasserdam. Alant, die baelju, is gecomen mit groot volc van wapenen in Slidrecht, ende heeft daer een groot swaer blochuis opten dijc opgeslagen, datter niemant verby reisen en mochte. Die van Dordrecht hebben hiertegen gecoren uut haer poorters vyer cloecke, vroem cappeteinen de alle last van den anstaende oorloge voeren souden, ende screven minlike brieven an alle de steden van Hollant ende Zeelant, dat si hem niet seer haesten wouden teghen hen te oorlogen, want wat die van³²⁸ Dordrecht nu geboert was, mocht hier namaels hemluden mede gescien.

328 van AB.