Van die victorie der Hollanderen teghen die Oest-Vriesen.
Dat VIII capitel.
Die biscop Willem van Uutrecht, verhorende dat die West-Vriesen tondergegaen ende verwonnen waren, so is hi overgetogen in Oest-Vrieslant, ende heeft aldaer doen condighen ende prediken des paeus oflaten tegens die Hollanders. Die Vriesen hebben den biscop beloeft bi te staen ende te hulp te comen mit alle hoer macht, ende zijn mit veel scepen haesteliken overgevaren na die stede van Monikendam in Waterlant. Die poorters van Haerlem mit die ander Waterlanders hebben terstont daertegen een groot heer van volc vergadert, ende zijn met groter geluit van trompetten, mit ontwonden bannieren desen Vriesen vromeliken tegen gegaen, ende vochten mit allen sere op dese Vriesen, die hen niet lange tegen en stonden; mer namen haren vlucht mit groter haesticheit, lopende sonder ordinancie na haer scepen toe, om weder over te varen. Denwelken die Waterlanders snelliken volgden, ende slogen hen veel volcks of, ende behilden mit groter eren de overhant. Die biscop van Uutrecht liet after zijn grote scip, ende is gevallen in een clein bootghen, ende is gevaren Overijsel, mit groter scande ende scade.
Auteursrechtelijk beschermd