Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den victorie die grave Jan hadde tegen die Vriesen, ende van der begravinge zijns vaders lichaem.
Dat VII capitel.

Int jaer Ons Heren M CC XCVII heeft grave

[p. 186r]

Jan van Hollant vergadert een groot machtich heer van volc, om die Vriesen weder te brengen tot zijnre subjectie ende onderdanicheit; ende is gecomen tot Alcmeer. Daertegen quamen die Vriesen mit alle hoer macht om een groten swaren strijt te wechten. Dese II hebben haer bataelgen geordineert, ende zijn mit blenkende ende ontwonden banniren, met geluyt van basunen tot malcanderen ingetreden; dat gecrijs ende geluyt was groot, ende der doden worden veel. Want die Hollanders ende Zeelanders hadden haer gedeelt in twe bataelgen, ende bevochten den Vriesen tot II einden, ende versloegen vromeliken vier dusent Vriesen. Ende die andere worden voervluchtich, ende verborgen hem in rietbuscen ende andere onbekende plaetsen. Van den Hollanders bleven doot here Jan die X here van Arkel, een vroom stout ridder, ende Jan van der Doortoghe, een cloec wapentuer, mit noch II ander, de te prisen zijn tot ewigen dagen, dat si haer lijf so vromeliken voer haren here ende lant gelaten hebben. Dese strijt gesciede opte VI kalende van aprille op de wide plaetse geheten Veronen, bi Alcmaer. Ende die grave toech binnen Alcmaer mit groter triumphen ende sege, ende nam vandaen zijn vaders lichaem, dat noch onbegraven stont, ende brochte dat tot Reinsburch int cloester, ende dede dat begraven bi sine huisvrouwe Beatris met wenender uutvaert, alst betaemde.