Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat slot van IJselstein gewonnen worde.
Dat IX capitel.

Die grave Jan van Hollant, anmerckende dat die biscop van Uutrecht nu II striden tegen hem hadde verwect, ende dat hi noch in Oversticht was om derden mael volc te vergaderen, heft hi ontboden here Gijsbrecht van Iselsteyn, dat hi hem op wilde doen zijn slot van Yselstein, om sine mannen van wapenen van den Hollanders daerop te mogen leggen, ende den biscop daeruut resistentie te doen, ende tlant van Hollant te bescermen. Ghijsbrecht van Iselstein heeft dit den grave geweigert, want hi des biscops man was ende een rechter ende president geset was in des biscops lant; waerom de grave toernich was, ende dede desen Gijsbrecht van sinen vianden verlagen ende vangen, ende belach dat slot van Iselsteijn mit veel volcs, ende lietet seer bestormen ende anvechten, mit menige assaulte ende sproncreise. Jonfrou Bartraert, Gijsbrecht van Iselsteins wijf, heeft haer vromelic gehat mitten ghenen die si bi haer hadde, ende behilden dat huis cloekelijck volna een jaer lang; ende ten lesten heeft hem de node daertoe gedwongen, omdat si geen vitalye meer en hadde, dat si dat huis opgaf, behouden dat si mitter helft de opten huse waren, daert lot op vallen soude, haer lijf soude behouden; ende van die ander helft soude hy sinen wille mit doen, die hi alle dede onthoefden. Die graef aldus dat slot vercregen had, heftijt gegeven here Wolfert van der Vere, mit de heerlicheit van Woerden, mit al sine jurisdictien ende privilegien, tot een erfleen van hem te ontfangen, opdat hi uut dien dat bisdom van Uutrecht anvechten ende verwoesten soude.

Hierna, int jaer M II C XCIX, als die West-Vrisen vernamen die voerspoet die dese jonge grave tegen den biscop had, ende mit zijnre mogenheit ende gracie Gods zijn lant ende zijn luden bescudde, begonnen si oec afterwaerts te dencken, dat si qualic gedaen had, ende deden an hem versoeken om genade, ende wouden hem beteringe doen tot zijn wille. Want hi hem liever genade dede, indien dat sijt begeerden, dan veel te striden, soe toech tot Alcmaer ende dede die machtichste van den

[p. 186v]

lande bi hem comen, ende sworen hem hulden ende onderdanicheit, daer si hem sulke brieven of ghaven als hierna gescreven staet. Wi, raet, scepenen ende alle die gemeente van West-Vrieslant, maken kondt allen luden dat van groter misdaet de wi misdaen hebben tegens enen hogen prince ende enen mogenden, onsen rechten heere Jan, grave van Hollant, van Zeelant, ende here van Vrieslant, also van den wige ende crige die wi tegen hem vochten te Vronen, ende van dat wij zijn huse braken ende van anderen misdaden die wi tegens hem misdaen hebben, in wat manieren dattet was, opten dach dat dese lettere gegeven was, gecomen sijn, ende compromitteren met onsen here voerseit by onsen vrien wille ende mit gemenen rade in enen hogen prince here Jan van Avennes, grave van Henegouwen, also dat hi mach ordineren sinen wille, ende taxeren die emenden ende beteringen van dyen voerscreven misdaet, ende op ons setten correctie ende emende, in penningen, in goeden diensten, in onderdanicheit ende in allen anderen manieren, na sinen wille; ende wi Vriesen voernoemt, beloven voer ons ende voer onse nacomelingen op alle goet dat wi hebben ende hierna winnen sullen, dat wi des voerscreven Jans van Avennes seggen vast ende gestade houden sullen, sonder wederseggen met meer woorden. Ende des te oirkonde, hebben dye van Hoochtwouderambocht, Nijerdorper ambocht, Drechtiger ambocht ende Gheestman ambocht desen brief besegelt mitten segele daer si hoer gemeen saken mede plegen te besegelen. Ghegeven in den jaer Ons Heren voorscreven, des saterdages na Alreheyligen dach.