Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den verraet dat tegen graef Floris opgenomen worde.
Dat XXIII capittel.

Here Gerrit van Velsen heeft raet gesocht an zijn wijfs vader, heer Harman van Woirden; ende sprekende van deser materien, swoer here Gerrit bi zijn ridderscap, dat dit gewelt ende dese craft an zijnre huysvrouwe gedaen nimmermeer ongewroken soude bliven; ende van dien dage voert en quam here Gerrit niet weder te hove, overleggende ende denckende dach ende nacht, hoe hi desen laster ende scoffiericheit soude wreken. Desgelijcken here Harman van Woerden en mocht niet vergeten den groten overdaet die an zijnre dochter bedreven ware, ende begreep enen groten nijt opten grave. Ende dese II brochten here Ghijsbrecht van Aemstel, die een slecht, out, simpel man was, dat hi mede consenteerde ende raet gaf in den verraderie des graven van Hollant. Doer wiens raet ende ingeven here Gerrit van Velsen, als een middelbode, vergadert heeft in der stede van Camericken, den biscop van Durans uut des conincs name van Engelant, den grave van Cuyc van des hertogen wegen van Brabant, II raetsmannen

[p. 183r]

des graefs van Vlaenderen, daer gediffineert ende mit vollen rade gesloten worde, als dat men grave Floris van Hollant levendich vangen soude, ende senden hem over den coninc van Engelant, die hem sijn leven lang gevangen houden soude; ende men soude des conincs swager oversenden in Hollant om te hebben die heerscappie.