Hoe dat grave Floris verlaecht worde van desen verraders.
Dat XXIIII capitel.
In den jaer Ons Heren M CC ende XCVI, grave Floris nyet wetende van desen opsette ende verraderije, is tot Uutrecht gereyst om neder te leggen ende te versonen den twedracht wesende tusschen die heren van Zulen ende enigen van sinen rade, als Gijsbrecht van Aemstel ende Harman van Woerden. Ende gaende ter kerken met sine ridderen ende familie, quam daer een arm vrouken doer Goods ingeven, ende gaf den grave een briefken in den hant al heymelicken, welken brief hy bi sinen secretarius dede lesen, inhoudende aldus: 'Conincs kint ende doerluchtige prince, aenmerct dat dye propheet David heeft gepropheteert: Die man mijns vrede, daer ic in betrouede ende hopede, ende mijn broot at, heeft grote vertredinghen op my gemaect.' Dye grave uut grootmoedicheit heeft dese woerden nyet geacht, ende heeft mit groter feeste mitten prelaten, ridderen ende burgeren van der stat, goet chijere ende een vrolicke maeltijt gehouden. Ende die maeltijt ghedaen wesende, heeft hem die grave gestelt om een luttel te rusten, ende voert dien dach mit vrolicheit over te brengen. Denwelcken here Ghisbrecht van Aemstel van den slape ontwect heeft, seggende, dat hi uuttrecken soude mit sine valkeners, want daer enen groten hoep van wilde vogelen in den velde waren. Och, die vogelen, die daer waren, en mocht men myt valken noch met sparwers vangen, mer waren daer gecomen om den grave te vangen! Die grave begeerlic wesende dat weijspul te hanteren, also hi daer grote genoechte in hadde, is uuter stat gereden, enen sconen sparwer op sinen hant hebbende, met hem nemende wenich van sinen heren ende knechten, ende is omtrent een halve mile doer die lagen der verraderen geleit. Ende als hi die lagen was gepasseert, is here Harmen van Woerden, here Ghisbrecht van Aemstel, Gerrit van Velsen, Aernt van Benscoop, Gherrit van Craienhorst, Willem van Teylingen, Willem van Zaenden mit veel ghewapents volcs dye van desen moortdaet niet een wisten opgeresen van hare lagen, ende heeft den grave alom besingelt, ende here Gerrit van Velsen, die seer op den grave gaende was, heeft eerst sinen geweldigen hant an den grave geslagen. Dye grave, als een onversaecht prince, heeft den sperwer van sinen hant geworpen, ende toech sijn swaert uut om hem te verweren; ende hadde lyever te sterven, dan hy hem alsulken verraders gevangen wilde geven. Mer ten mocht hem niet baten, want die valsche verraders, die haers heren cledinge an den lieve hadden ende dyen dage van zijnre spisen gegeten hadden, hebben desen vorsteliken prince verradeliken ghevangen, ende hebben hem seer heimeliken dyen nacht gevoert op dat huys te Muden, om hem also voert levendich in Engelant den coninc over te senden.
Auteursrechtelijk beschermd