grave Floris van Hollant, dair veel leets of quam.
Dat XXII capitel.
In desen graef Floris hof was een cloeck ende grootmoedich ridder, starc van lichaem, ende vroem ter wapenen, geheten here Gerrit van Velsen. Doer ingeven ende raet sommiger heren hadde graef Floris den broeder van desen here Gerrit doen onthoefden, ende hilt desen here Gherrit bina een heel jaer gevangen. Ende die grave ondertastende die sake, heeft hi in der waerheit bevonden desen heeren Gherrit der saken onsculdich wesende die men hem opseyde, ende heeft hem daeromme seer verheven boven andere heren, om hem weder te trecken tot sijnre vrientscappen. Die grave hadde een scoen joncfrou tot eenre vriendinne ende boele, ende dien woude hi here Gherrit geven tot enen gheechten wive. Mer here Gerrit en woud se niet hebben. Ende als de graef desen heren Gerrit dus lasterlic ende moeylijc was om dese joncfrouwe te trouwen, so seide here Gerrit ten lesten met groter onwaerdicheit, hi en woude sijn boel ende huer nit nemen. Daer die grave wederom uut toirnicheit op antwoirde, seggende: 'Ende ghi sult ymmers mijn huer hebben.' Here Gerrit die en achte des graven woerden niet, ende nam te wive here Harmans dochter van Woerden, heeren Ghijsbrechts nichte van Aemstel. Daerna, doer ingeven van deser buelen, heeft grave Floris gesonden here Gerrit van Velsen in verren landen, in commissie van sekere nootlicke saken, also hi sine heimelicke raet ende secretarius was. Ende die grave is getogen met weynich van sinen huysghesin op dat huys te Cronenburch, daer here Gerrit van Velsen mit sijn huysvrouwe doe ter tijt woenden. Dese vrouwe van Velsen heeft horen here den grave minlicken ende vrientlicken ontfangen, mit groter eren, ende tracteert alsoet sulken here ende prins betaemde. Die grave hem veynsende sonderlinge sakenGa naar voetnoot317 willen tracteren, heeft hem doen brengen van deser vrouwen in een heimelicke secrete camere, opdat si daer te vrier tsamen souden spreken ende zijn meninge haer ontdecken. Die vrouwe geen quaet vermoedende, heeft hem geleit in hair heimelicke slaepcamer. Daer comende heeft hij dye doere vast gesloten, ende sinen opsetten ende wille mit deser vrouwen gedaen ende volbrocht, ende is terstont weder vandaen gereist. Die vrouwe sere bedroeft wesende, heeft alle chierheit van habiten ende cleinoden van haer geleit, bescreyende also haer misval ende gewelt, dat haer was geschiet. Here Gerrit van Velsen, ghedaen ende volbrocht hebbende dye commissie sijns heren, daer hi om gesonden was geweest, nyet wetende van desen geweldigen misdaet, heeft oerlof genomen an den grave, ende is haestelicken gereist na sijn huys ende woenstat tot Cronenburch, ende heeft zijn vrouwe gevonden in groten verdriet ende misbair. Here Gerrit dese suke vernemende ende wel verstaende, heeft se minlicken getroost, veynsende hem niet te weten van datter was gesciet, ende beval zijn huysvrouwe, dat si trecken soude tot haren vader, heer Harman van Woerden, ende geven hem dese sake te kennen; dwelc si dede, ende begeerde van haren vader dat hi haer dit wilde vergeven, wanttet tegen horen groten wille waer geschiet.
Auteursrechtelijk beschermd