Van enen stride die graef Floris hadde tegens die Vriesen, ende hoe hi vant sijns vaders graf, ende brochte dat gebeente in Zeelant, tot Middelburch, int cloester van den Premonstreiten oerde.
Dat XII capitel.
Na dien, dat grave Floris van Hollant dat starcke casteel tot Widenesse hadde doen maken, is hi mit groter heercracht getogen in Vrieslant, in een dorp genoemt Scellinghout, daer hi van den Vriesen victori hadde, ende toech voert in een dorp geheten Hoochtwoude, daer hi den Vriesen vromelicken angevochten heeft, ende versloecher omtrent VI C Vriesen, behoudende die zege ende overhant. Desen strijt geschiede in den jare M CC ende LXXXII. In desen stride worde ghevangen een out Vriese, diewelcke grave Floris wijsde dat graf dair zijn vader, coninc Willem, grave van Hollant, begraven lach. Die grave Floris liet dat graf sijns vaders opdoen, ende liet dat ghebeente scoen wasschen, ende leydet in een kiste, ende brochtet tot Uutrecht, daer doe een heerlicke ende costelike uutvaert overGa naar voetnoot306 hem worde gedaen. Daerna is hi mit dat ghebeente ghetogen in Zeelant, ende heeftet ghebrocht tot Middelburch in der abdien, ende liet dat daer begraven settende dat boven der aerden in een tombe mit coninclicker ende betamelicker uutvaert, als dat behoerde.
Auteursrechtelijk beschermd