Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die graefinne van Hennenberch, die tot eenre dracht also veel kinder ter werelt brochte, als daer dagen int jaer zijn.
Dat X capittel.

Grave Floris, die XIII grave van Hollandt, coninc Willems vader, hadde onder andere kinderen een dochter geheten Machtelt, dye hij te man gaf graef Harman van Hennenberch. Hare broeder was coninc Willem van Rome, grave van Hollant. Biscop Otte van Uutrecht was haer oem van svaders wegen, ende hertoge Henric van Brabant was haer oem van smoeders wegen, ende Alijt, graefinne van Henegouwen, was haer moye, ende Otte, grave van Ghelre, ende Henric, biscop van Ludick, sijn broeder, waren haer neven. Het geviel tot eenre tijt, dat dese graefinne van Hennenberch een arm vrouken, wiens man gestorven was, bi den doeren sach gaen bidden haer broot om Goods willen, hebbende op elcken arm een kindeken, diewelcken si tot eenre dracht ter werlt hadde gebrocht. Die graefinne dit vrouken siende, heeft se versmaet ende versproken, seggende dattet niet mogelic en waer meer dan een kint van enen man tot eenre mael mogen ontfangen. Dat vrouken heeft hair betamelicken verantwoert, seggende dattet bi Gods gehengenisse wel geschien mochte. Mer die graefinne en woude dat nyet geloven, ende heeft dese vrouwe scoffierliken toegesproken ende scandelicken van haer verdreven. Waeromme dit vrouken seer gestoert was, ende heeft haer ogen ten hemel geslegen, God, Die alle ding machtich is, biddende oetmoedelicken dat Hi der graefinne also veel kinderen wilde verlenen tot eenre dracht, als daer dagen int jaer comen; dwelcke also is geschiet. Die graefinne is bevrucht gheworden mit kinde van haren man, die graef van Hennenberch; ende swaer wesende, is si nederwaert getogen in Hollant. Ende als si die tijt

[p. 178v]

anquam dat si baren soude, is si also uutermaten grof ende swaer geworden, dat nye mensch desgelijcs gesien ofte gehoert hadde. Ende also dese graefinne een moye was van graef Floris van Hollant, so quam si tot hem in Loesdunen. Ende als men screef M CC LXXVI, op Onser Lieven Vrouwen dach in die Vasten, ende was doe die Goede Vridach, so beviel dese graefinne, ende baerde CCC ende LXV kinderen, die alle volmaect van leden waren. Ende biscop Otte van Utrecht, haer oem, doopte alle dese kinderen in een becken, ende die knechtkens worden geheten Johannes, ende die meyskens Elizabeth. Ende so ghering als si waren gedoept, storven si allegader mit haer moeder, die graefinne, ende worden alle ghelijc daer int cloester begraven, als men noch huden des dages sien mach in haer histori over dat graf ghemaect.