Van denGa naar voetnoot305 strijt die graef Florijs hadde teghen die Vriesen.
Dat IX capittel.
Als grave Floris out was omtrent XVII jaer, heeft hi in den jare Ons Heren M CC ende LXXI, den X dach van augusto, doen vergaderen een groot machtich heer tegens die West-Vriesen, om die weder te brengen tot sine onderdanicheyt, ende mit crachte daeruut te halen sijns vaders gebeenten, ende die in Hollant te brengen. Die Vriesen stelden hem ter weer, ende quamen tot Veronen op die geest. Ende daer geviel enen strijt daer V C Hollanders verslagen worden, daer die vermaerste ende cloeckste ridders of waren, als here Wermbout uuten Hage ende Aelbrecht zijn soen; Dirck van Raephorst ende Gerrit, zijn broeder; Jacob van Wassenaer; Barent uuten Hage; Gerrit van Haerlem, ende Wouter die Vriese, baelju van Kermerlant, mit Willem zijn soen. Ende als die Hollanders so vele vrome wapentuers ende mannen van oerlogen verloren hadden, togen si afterwerts, ende namen die vlucht, tot Heiligeloe toe opten slechten ackeren; ende dair geviel weder enen strijt, want dye Hollanders versche wapentuers hadden gecregen. Ende dair worden omtrent VIII C Vriesen geslegen. Aldus worde der heren doot an den Vriesen weder gewroken.
Auteursrechtelijk beschermd