Van die victorie bisscops Henricxs van Uutrecht tegen den grave Gerrit van Gulic.
Dat III capitel.
In desen tiden is daer een groot oerloge ende twist opgestaen tusschen den biscop Coenraet van Coelen ende grave Gherrit van Gulic. Die biscop van Uutrecht heeft haestelic een machtich heer van volc uut Hollant ende uut sijn Sticht te samen vergadert om sinen overheer den biscop van Colen te helpen ende bistant te doen. Als nu dese II machtige heren op een slecht velt vergadert waren om des anderen dages enen strijt te vechten, is dye bisscop van Uutrecht omtrent den avont mit alle sijn heer opgebroken, veinsende hem te vlien ende na sine landen weder te trecken. Mer so gheringe als den dach bestont te lichten, smargens vroe, is die biscop van Uutrecht getogen int lant van Gulick, stichtende roef ende brant, ende heeft vele gevangen gecregen uut alle de dorpen die hem hier niet voer en hoeden. Die wakers, die die nachtwake hilden, ansiende den roock ende brant in horen landen van Gulic opgaende, hebben mit groten geroep ende gecry alle dat Gulicse heer vervaert, ende zijn mitsdien seer weerslachtig geworden. Afterlatende alle haer tenten ende pauweljoenen, zijn si met groter haesticheit na huys getogen. Die biscop dit siende ende vernemende, heeft sijn volc gestelt in goeder ordinancien, ende is mit blinckenden ende ontwonden bannieren, mit blasender basunen desen Gulicksen sijn stoutelicken tegemoet gegaen, ende heefter vele van dyen geslegen ende gevangen, mit groter victorien verjaecht, ende den strijt gewonnen. Ende also is dye biscop van Colen, overmits groter cloecheit ende vromicheit van des biscops Henrics van den anstaende strijt verlost geweest. Ende die bisscop is mit grooter triumphen, mit vele ghevanghen ende mit groten rijcdomme wederom ghekeert in sine landen.
Auteursrechtelijk beschermd