Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van Florijs die V, die XVI grave van Hollant, Zeelant ende here van Vrieslant, ende van sijne voechden.
Dat II capitel.

Nadat coninck Willem aldus deerlick verslaghen was, werde die XVI grave van Hollant, Zeelant ende heer van Vrieslandt Florijs sijn soen, van dier namen die vijfte, een kint van een half jaer. Desen jonghen ontfing in sijnre hoeden Florijs, coninc Willems broeder, ende des kints oem, drossaet van Hollandt, ende berechte dat graefschap van Hollandt als voecht ende momber drie jaer langhe in grooter vreden. Ende gaf den Zeelanders bescreven koeren ende rechten, dye si noch in Zeelandt onderhouden ende ghebruycken.

[p. 175v]

Hiernae worde dese Florijs voerscreven in een tornoey tot Antwerpen sere ghequest, also dat hi daerof starf; ende wert ghevoert tot Middelburch, ende wert aldair begraven in der abdyen int jaer Ons Heren M CC ende LVIII. Daerna nam dit kint in sijnre behoeden ende bewaren Henric, hertoge van Brabant, zijn outoems soen, ende berechte Hollant een wijl tijts; die naderhant, om overdaet sijnre dienres, onwaerdelic uut Hollant verdreven worde. Na denwelcken die heren ende edelen van Hollant namen tot horen geboren graefs momber Otto, graef van Gelre, des kints ouder moyen soen. Daertegen coren die heren ende edelen van Zelant Alijt, graefinne van Henegouwen, dat si haer broeders kints voecht soude wesen. Van welcker twedracht daerna een grote strijt gevallen is in Voernoutzee²⁹⁷, daer vele menschen an beiden siden doot gebleven sijn. Mer die grave mitten Hollanders wonnen den strijt, ende graef Otte bleef mit machte voecht van Hollant ende beware des lants van des jongen graef Florijs weghen.

297 voervotzee AB.