Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Anno M CC ende LV.
Keyseren.

Na den doot des edelen coninc Willem, grave van Hollant, die van den Vriesen was verslaghen int jaer Ons Heren M CC ende LV, op die V kalende van februarius, ende dat keyserrijc lange ledich gestaen hadde, so sijn die koervorsten in twe pertien gedeelt; want enige koren Alfonsum, coninc van Castilgen, ende andere Richardum, des conincks broeder van Engelant, grave van Carnubien; mer geen van beyden en was van den paeus geconfirmeert. Ende als Richardus gestorven was, resigneerde Alfonsus alle sijn recht dat hi ant keyserrijc hadde in handen van den paeus Gregorius die X. Hi was een wijs man ende een groot astronimus, seer gheleert in den loop des firmaments. Dese II regneerden tsamen XV jaer.

Anno M CC LXX.

Rodolphus, graef van Habspurch, worde van den coervorsten tot enen keyser ghecoren naedattet²⁹⁵ Rijck langhe tijt ledich hadde ghestaen, overmits die tyrannichheit des keisers Vrederics. Ende dit was int jaer M CC ende LXXIII. Hi was een eerbaer man, wijs ende vroem ter wapen. Die paeus Gregorius die Thiende approbeerde sine

295 naedatttet AB.

[p. 175r]

electye om gonst die hi hadde totten Heiligen Lande. Hi ontfinc dat cruys ter bede van de paeus mit coninck Lodewijck van Vrancrijck, mit meer andere heren ende princen, mer dye coninc ende veel kersten mit hem storven onderwegen van der pestilencien. Ende als dese keyser Rodolphus mit outheden ende siecten sere was beladen, is hi tot Erffoert ghestorven, ende wert tot Spiers ghevoert ende daer bi den anderen keyseren begraven int jaer Ons Heren M CC ende XCI opten XXII dach in julio. Hi regneerde XVIII jaren.

In desen keisers tiden, als in den jare Ons Heren M CC LXXIX, heeft Carolus, grave van Provincien, die namaels coninc van Sicilien wert, ghevonden Sinte Marien Magdalenen lichaem, daert van Sinte Maximinus begraven was. Ende doe men dat graf op dede, quam daeruut enen soeten roeck. Ende uut haer mont was gewassen een grote telch, die an veel stucken gedeelt voer heylichdom in veel plaetsen gehouden wordt. Ende in die selver grafstede wert gevonden²⁹⁶ bescreven: Hier rust Sinte Marien Magdalenen lichaem. Doe dit aldus gevonden was, dede die grave voerscreven biscopen, abten, religiosen, edelingen tesamen roepen, dye dit heilige lichaem mit groter devocien ende eerwaerdicheit verhieven ende in een gouden costeliken casse, mit duerbaer gesteenten verciert wesende ende daertoe bereit, geleyt hebben int jaer Ons Heren M CC ende LXXX, opten V dach in meye. Dit heilige lichaem was eerst begraven gheweest in een tombe van alabaster gemaect, ende wort namaels vervoert ende gheleit in een tombe van marmersteen, dairt nu ter tijt gevonden wert. Etcetera.

Omtrent dese tijt ist geboert binnen die stede van Maestricht, dat vele luden, mannen ende vrouwen, enen groten dans hadden gemaect op die grote stenen brugge. So gevielt, dat die priester mitten waerden Heiligen Sacrament daer verby ghinc tot een cranck mensche. Ende also si dat Heilige Sacrament geen eer noch reverencie bewesen, so is uut die verhengenisse Gods die brugge ingestort, ende dair verdroncken boven die CC menschen in der Masen, dat verdrietelic was om sien.

In den Stichte van Constans in Hoech-Duytslant brocht een vrouwe een vrucht ter werlt gelijc een leeuwe geclaeuwet ende ruych, hebbende eens menschen aensicht.

296 genonden AB.

Anno M CC LXXXVIII.

Adolphus, grave van Nassouwen, worde eendrachtelicken van den koervorsten gecoren tot een keyser; mer hi en worde niet gecroent noch geconfirmeert van den paeus. Hi was een vroem man ter wapen, mer hi en street niet veel mit machten. Hi hadde enen strijt tegen hertoge Aelbrecht van Oestenrijc, die na hem keyser wert; daer hi in doot bleef, mer meer verdruct dan geslegen. Desen strijt is gesciet bi Spiers ende Worms int jaer M CC XCII. Hi regneerde VI jaer.