Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier beghint dye XIX divisie ende heeft XXVI capitelen.

Dat I capitel.
Paeusen.

Anno CC LXII.

Urbanus die Vierde was dye hondert XCI paeus; hi was een Romeyn, ende sat III jaer, een maent ende IIII dagen. Hi institueerde ende insette die hoechtijt van den Heyligen Sacrament, daertoe verlenende scone gracien ende grote oflaten. Hi leit tot Sinte Laurens begraven. Na zijnre doot vaceerde dat paeusdom V maenden.

Item. Int jaer ons Heren M C C ende LXIIII openbaerde een comeet int middel van der maent van julio. Dese scheen int beghin van der nacht int west. Ende na weinich dagen openbaerde hi int oest, sijn radien streckende totten westen. Dese comeet duerde totten eynde van september. Ende si was gelijken een duyster sterre, ofgevende van hem een vlamme, welcker grootheit ende forme was gelijck een zeyl in een schip, ende hoe langer hoe claerrer; ende die vlamme werdt cleynre in der²⁹² breet, mer si wies in der langhe, so dat opten X dach van october, voer dye dageraet, dese comeet ghesien werdt int suyden, ende die vlamme sceen te wesen een cubitus groot, ende began allencken te vergaen. Ende want dese comeet in versceiden landen veel beteykende, mer sonderling doe dese comeet eerst openbairde werdt dye paeus Urbanus die IIII sieck, ende starf opten lesten dach van september, dat was opten selven nacht dat dye comeet des jaers te voren of liet te schinen.

Clemen die IIII was die C XCII paeus. Hi was geboren uut provincien. Hi besat den stoel III jaer, IX maenden, XXI daghen. Hi was eerst een waerlijck man, hebbende wijf ende kinderen. Na zijn wijfs doot wort hi biscop van Podien; daerna aertsbiscop van Narboenen; ende doen wert hi cardinael ghemaect. Ende om zijnre grote sciencie ende heilichheits van leven, wert hi paeus gecoren. Uut Godliker inspiracie voirseide hi vele toecomende dingen. Hi leit te Viterbien begraven. Ende also die cardinalen sijns gelijcs van leven niet en konden vinden, overmits hare groter twedrachticheit, so stont Sinte Pieters stoel ledich sonder paeus II jaer.

Gregorius die X was die C XCIII paeus; hi was van Placencien. Hi sat IIII jaer, II maenden, X dagen. Uut Godlicker ingeven quam hi an dat paeusdom. Hij was eerst domproest tot Ludick. Hij dede veel goets in der Heyliger Kercken. Hij starf te Arethien, ende leyt

292 ende AB.

[p. 174v]

aldaer begraven, doende vele miraculen.

Innocencius die V was dye C XCIIII paeus. Hij was uut Bourgondien: een glorioes doctoer in der Godheit van der Prediker Oerden. Hi sat V maenden, VII dagen, ende starf te Romen, ende wert tot Sinte Jans te Latranen begraven.

Adrianus die V was die C XCV paeus. Hi was van Genuen. Hi en sat meer XL dagen, ende hadde wonderlicke dingen opgenomen te doen. Hi starf tot Viterbien, ende leyt aldaer begraven totten Minrebroederen. Dat paeusdom vaceerde na sijn doot XXVIII daghen.

Johannes die XXI was die C XCVI paeus. Hi was van Lissebon uut Portegael. Hi dede sijn dienres verstaen dat hi lange tijt soude leven. Mer onversiens werdt hi van eenre muren bevallen van een nyewe camer dye hi dede maken te Viterbien, ende werdt daer begraven in Sinte Laurens kerck, als hi VIII maenden den stoel beseten hadde. Na sijnre doot vaceerde dat paeusdom VI maenden.

Nicolaus²⁹³ die III was die C XCVII paeus; hi was een Romein van der Ursinen geslachte. Hi sat III jaer. Hi en dede nimmermeer misse dan mit overvloedige tranen. Hij starf van der popelzye ende werdt te Romen in Sinte Pieters kercke begraven. Na sijnre doot vaceerde dat paeusdom²⁹⁴ V maenden.

Martinus die IIII was die C XCVIII paus. Hi was een Wael, van Tours geboren. Hi sat IIII jaer, een maent. Hij starf tot Perusen ende wert daer begraven, doende veel miraculen.

In sijnre tijt worde een visch in der zee gevangen, hebbende een leeuwenhoeft; ende als hi opt lant wert gebrocht, gaf hi een groot vervaerlick gheluyt; ende worde tot Romen gebrocht ende allen menschen ghetoent, daer groot verdriet na volchde.

Honorius die IIII was die C XCIX paeus. Hi was een Romein, ende sat II jaer ende enen dach. Hi was een man van groter vreden, ende starf tot Romen, ende wert in Sinte Pieters kerck begraven. Dat paeusdom vaceerde na sijnre doot X maenden.

Nicolaus die IIII was die CC paeus. Hi was een Lombert, ende sat IIII jaer ende een maent. Hi dede veel goets in der Heyliger Kercken. Hi leit tot Romen tot Sinte Marien Maioers begraven. Na sijnre doot vaceerde dat paeusdom II jaer, III maenden, XVIII dagen.

Celestinus die V was die CC I. paeus. Hi was een Lombert ende een devoet heylich man, wonende in der woestinen. Hi resigneerde dat paeusdom als hi V maenden ende enen dach dat beseten hadde. Hi wert van sijn nacomer in een strenge karcker besloten, daer hi in starf, doende veel miraculen. Ende Clemens die V canoniseerde hem, ende insette sinen dach opten naem van Sinte Pieter confessoer. Van desen paeus heeft dye oerde van den Celestinen horen naem.

293 Nicolans AB.

294 paesdom AB.